«افغانستان آزادلیک جبههسی» نورستاننینگ کامدیش تومنی و کنر ولایتینینگ ناری اولسواللیگیده اۉز کوچلری بیلن طالبان اۉرتهسیدهگی تۉقنهشوولرده گروه نینگ ۳۷ اعضاسی اۉلدیریلگنی و ینه ۲۴ نفری یرهلنگنی حقیده معلوم قیلدی.
مذکور جبههگه کۉره، بوگون کېچقورون (یکشنبه، ۵میزان) نشر قیلینگن بیاناتده نورستاننینگ کامدیش اولسواللیگی و کنر ولایتینینگ ناری تومنیدهگی «بیر نېچته قیشلاق» همده طالبلرگه تېگیشلی «بیر نېچته نظارت-اۉتکزیش پسته» اونینگ کوچلری تامانیدن اېگهللب آلینگنی ایتیلگن.
«افغانستان آزادلیک جبههسی» شونینگدېک، اۉز کوچلرینینگ طالبلر تامانیدن قۉلگه آلینگنینی رد اېتیب، «طالبلرنینگ ترغیبات اپاراتی ساخته خبرلر و نورستان ولایتیدهگی عادي فقرالر، یۉلاوچیلر و ایچکی سیاحلردن مجبورلش و تضییق آستیده آلینگن ویدیولرنی ترقهتیش آرقهلی جنگ میدانیدهگی مغلوبیتلرینی آقلشگه و ناتۉغری معلوماتلر ترقهتیب، جماعتچیلیک فکرینی چلغیتیشگه اورینماقده»، دېب بیلدیرگن.
جبههنینگ قۉشیمچه قیلیشیچه، افغانستان شرقیدهگی اونینگ کوچلری «اساسن محلي و شو حدودده توغیلگن یاشلردن عبارت بۉلیب، اولر عملیات حدودلرینی یخشی بیلهدی همده اوروش آلیب باریلهیاتگن جیوگرافیک حدوددهگی وضعیتنی یخشی توشونهدی و نظارت قیلهدی».
طالبلر مدافعه وزیرلیگی هم بوگون اوشبو تۉقنهشوونی تصدیقلب، اونده قتنهشگنلرنی «داعش فتنهچیلری و یاووزلیک همده فساد عنصرلری» دېب اتهدی و اولر پاکستاندن افغانستانگه یوباریلگنینی بیلدیردی.
وزیرلیکنینگ ایتیشیچه، طالبلر کوچلرینینگ هجوملری نتیجهسیده ۲۸ کیشی اۉلدیریلگن و ینه ۳۲ کیشی تیریکلهیین قۉلگه آلینگن.
طالبان اجتماعي ترماقلرده بیر نېچته ویدیونی هم ترقهتگن. اولرده اَیریم شخصلر اوشبو گروه کوچلری تامانیدن قۉلگه آلینگنی و بعضیلری پاکستاندن افغانستانگه کیریب کېلگنینی تن آلهیاتگنی کۉرینهدی.
طالبلرنینگ دعوا قیلیشیچه، بو ویدیولر نورستاندهگی تۉقنهشوو حدودیدن قۉلگه آلینگن شخصلرگه تېگیشلی.
شونینگدېک، طالبلر بو شخصلرنی حربي یوک موترسیده نورستان ولایتی مرکزی پرون شهری بۉیلب آلیب یورگنی و کۉپلب آدملر اولرنی تماشا قیلگنی عکس اېتگن ویدیولر هم ترقهتیلگن.
مستقل منبعلر حاضرچه بو شخصلرنینگ کیملیگی، قندهی قۉلگه آلینگنی و اولرنینگ اقرارلیک ویدیولری قندهی شرایطده تصویرگه آلینگنینی تصدیقلهمهگن.
«افغانستان آزادلیک جبههسی» اوّلراق نورستاندهگی تۉقنهشوولر کېچه اېرتهلب طالبلرنینگ پیاده کوچلری و درونلری تامانیدن اونینگ موضعلریگه اویوشتیریلگن هجوم بیلن باشلنگنینی معلوم قیلگن اېدی.
جبهه ینگی بیاناتیده اونینگ کوچلری «کامدبش و ناری تومنلرینینگ آزاد قیلینگن قیشلاقلری و حدودلریده اۉز استحکاملری همده مدافعه موضعلرینی سهقلب قالگن، اَیریم ضعیف نظارت-اۉتکزیش پستهلریدن اېسه وقتینچه چېکینگن»، دېب بیلدیرگن.
شو بیلن بیرگه، طالبلر مدافعه وزیرلیگی نورستاندهگی تۉقنهشوولرده قتنهشگن قالگن شخصلر ینه پاکستانگه قَیتیب کېتگنینی دعوا قیلگن.
«افغانستان آزادلیک جبههسی» و طالبلر اۉرتهسیدهگی نورستاندهگی تۉقنهشوولر، اولرنینگ بدخشان نینگ زیباک اولسواللیگیدهگی تۉقنهشوولریدن کېین، سۉنگگی بېش ییل ایچیدهگی ایکّی تامان اۉرتهسیدهگی اېنگ شدّتلی تۉقنهشوولردن بیری حسابلنهدی.
طالبلر عادتده اۉزیگه قرشی قوراللی مخالف جبههلرنینگ هجوملرینی تصدیقلهمهیدی، بیراق نورستان و بدخشاندهگی تۉقنهشوولرنی تصدیقلهگن.
