پاکستان اخبارات و نشرات وزیرلیگی طالبلرنینگ پاکستاننینگ افغانستان شرقیدهگی نورستان ولایتیده یقینده یوز بېرگن تۉقنهشوولرده اشتراک اېتگنی حقیدهگی دعواسینی رد اېتیب، اونی «پوج، اساسسیز و هېچ قندهی حقیقتدن خالی» دېب بهالهگن.
اوشبو وزیرلیک بوگون (یکشنبه، ۵-مېزان) بیانات نشر قیلیب، «پاکستان خوفسیزلیک کوچلری یاکه استخبارات تشکیلاتلرینینگ نورستاندهگی یاکه افغانستاننینگ باشقه حدودلریدهگی ایچکی تۉقنهشوولرگه ارهلشگنی حقیدهگی اویدیرمه دعوالرنی قطعیاً رد اېتهدی. جملهدن، افغانستاننینگ سابق خوفسیزلیک کوچلری اعضالرینی یاللش یاکه اۉقیتیش، شونینگدېک، افغانستانده فعالیت یوریتهیاتگن داعش یاکه باشقه ترورچی گروهلرنینگ فعالیتیگه کمکلشیش حقیدهگی دعوالر هم رد اېتیلهدی»، دېب معلوم قیلگن.
پاکستان اخبارات و نشرات وزیرلیگی «پاکستاننینگ ارهلشووینی اثباتلش اوچون حتا بیرته دلیل هم تقدیم اېتیلمهگنینی» بیلدیرگن. طالبلرنینگ دعواسینی قۉللب-قوّتلش اوچون نشر قیلینگن ویدیوده اېسه «فقط بیر نېچه قورالسیز شخص کۉرسهتیلگنی، اولرنینگ حتا تېگیشلی کییم یاکه جهازلری هم یۉقلیگی و اولر طالبلر رژیمی تامانیدن آلدیندن رېجهلشتیریلگن ویدیو تصویریده آلینگن صحنهگه اۉخشهش جایده قۉلگه آلینگنی» ایتیلگن.
وزیرلیک افغانستان حدودیده تورلی «ترورچی گروهلر» نینگ موجودلیگی و فعالیتی یخشی حجتلشتیریلگنینی، جملهدن، بیرلشگن ملتلر تشکیلاتی و باشقه خالص خلق ارا تشکیلاتلرنینگ کېتمه-کېت حساباتلریده بو حقده معلومات بېریلگنینی تأکیدلهگن.
پاکستان اخبارات و نشرات وزیرلیگی شوندهی دېگن: «افغانستان طالبلر رژیمینینگ پاکستاننی تروریزمنی قۉللب-قوّتلشده عیبلشی جوده استهزالیدیر. حالبوکه، افغانستانده فعالیت یوریتهیاتگن ترورچی تشکیلاتلر پاکستان و منطقه خوفسیزلیگیگه بېواسطه تهدید بۉلیب قالماقده.»
وزیرلیک قۉشیمچه قیلگن: «طالبلر رژیمینینگ نه قمراولی، نه خلق نینگ حقیقي وکیلی بۉلگن بوندهی دعوالری ایچکی ناراضیلیکلر همده عیاللر، بالهلر و آزچیلیکلرنینگ باستیریلیشیدن جماعتچیلیک اعتبارینی چلغیتیش مقصدیده ترقهتیلهیاتگن یالغانلرنی هم کۉرسهتهدی.»
طالبلر مدافعه وزیرلیگی بوگون نورستاندهگی تۉقنهشوونی تصدیقلب، «بیر نېچه گروه داعشگه منسوب فتنهچیلر همده یاووزلیک و بوزغونچیلیک عنصرلری پاکستان پولیسلرینینگ قۉللب-قوّتلشی و رغبتلنتیریشی بیلن دیورند چیزیغینینگ نریگی تامانیدن افغانستان حدودیگه یوباریلیب، بوزغونچیلیک قیلیش و بېقرارلیکنی یوزهگه کېلتیریشگه حرکت قیلگنینی» بیلدیرگن.
اوشبو وزیرلیک، شونینگدېک، «بو فتنهده فایدهلنیلگن شخصلرنینگ اکثریتی سابق حکومت خوفسیزلیک کوچلری خادملری بۉلگنینی، اولر پاکستان استخبارات تامانیدن اولرگه باشپناه و خارجي مملکتلرده یوقاری معاشلی ایشلر بیلن تأمینلنیشی وعده قیلینگن حالده پاکستانگه چقیریلگنینی» دعوا قیلگن. وزیرلیکنینگ ایتیشیچه، اولر پاکستانگه بارگچ، پاکستان اوردوسی و آی است آی تامانیدن تشکیل اېتیلگن کمپلرگه آلیب باریلگن و قیسقه مدتلی حربي تیارگرلیکدن سۉنگ افغانستانده بېقرارلیک یرهتیش اوچون نورستان ولایتیگه یوباریلگن.
طالبلر مدافعه وزیرلیگی، شونینگدېک، «منطقه دولتلری هم پاکستان حربيلری ینه بوتون منطقهنی بېقرارلشتیریش نیتیده اېکنیگه اعتبار قرهتیشی کېرهک. اولر پاکستاندن اوروشنی اېکسپورت قیلیش، یاووز نیتلی شخصلرنی تیارلش و باشقه مملکتلرده بېقرارلیک یرهتیش اوچون اولرنی یوباریش لایحهسی بیلن شغللنماقده»، دېب بیلدیرگن.
بو آرهده «افغانستان آزادلیک جبههسی» اۉز کوچلری نورستانده طالبلر بیلن تۉقنهشگنینی معلوم قیلگن. جبههگه کۉره، تۉقنهشوولرده طالبلرنینگ ۳۷اعضاسی هلاک بۉلگن، ۲۴ نفری یرهلنگن، شونینگدېک، اَیریم نظارت-اۉتکزیش پستهلری و حدودلر اېگهللب آلینگن.
