طالبلر عدلیه وزیرلیگی‌نینگ معلوم قیلیشیچه، اوشبو گروه‌نینگ مخصوص محکمه‌سی کابل ولایتی‌نینگ پغمان اولسواللیکیده ۵۰ جریب یېرنی «دولت ملکی» دېب بېلگیله‌گن.
وزیرلیک بوگون، چهارشنبه (۲۹ میزان) نشر قیلگن بیاناتیده ایتیشیچه، مذکور یېر سکّیز بۉله‌کدن عبارت بۉلیب، پغمان اولسواللیگی‌نینگ ارغندی حدودیده جایلشگن.
بیاناتده قید اېتیلیشیچه، «یېرلرنی ناقانوني اېگه‌للب آلیش‌نینگ آلدینی آلیش و اېگه‌للب آلینگن یېرلرنی قَیتریش کمیسیونی» اوّل بو یېرلر مسأله‌سینی کۉریب چیقیب، اولرنی دولت ملکی دېب بېلگیله‌گن. بیراق حاضرگی یېر اېگه‌للاوچیلری بو قرارگه راضی بۉلمه‌گنی سببلی، ایش «مرکزي حدودده‌گی دولت تصرفیده‌گی اېگه‌للب آلینگن یېرلر بۉییچه ایشلرنی کۉریب چیقووچی مخصوص محکمه»گه یوباریلگن.
طالبلرنینگ مخصوص محکه‌سی هم یېر اېگه‌للاوچیلری و کمیسیون تامانیدن تقدیم اېتیلگن حجتلرنی کۉریب چیقیب، جمع‌ی ۵۰ جریبدن عبارت اوشبو یېرنی «دولت ملکی» دېب اعلان قیلگن.
طالبلر بوندن تۉرت کون آلدین هم کابل ولایتی‌نینگ پغمان اولسواللیگی‌نینگ ارغندی منطقه‌سیده ۱۲۲جې ریب یېرنی «دولت ملکی» دېب اعلان قیلگن اېدی.
