طالبلرنینگ تشقی ایشلر وزیری امیرخان متقی روسيهنینگ افغانستان بۉییچه مخصوص وکیلی ضمیر کابلوف بیلن اوچرهشیب، ایکّی تامانلهمه مناسبتلرنی رواجلنتیریش، خصوصاً، سودا-ساتیق حجمینی آشیریش و بو بارهده موجود امکانیتلردن فایدهلنیش مسألهلرینی محاکمه قیلدی.
طالبلر تشقی ایشلر وزیرلیگی بوگون (سهشنبه، ۱۹ عقرب) ایکس اجتماعي ترماغیده بیانات نشر قیلیب، اوشبو اوچرهشوو حقیده معلوم قیلدی.
وزیرلیکنینگ بیلدیریشیچه، امیرخان متقی روسيه بیلن مناسبتلرنی مهم دېب اتهب، هر ایکّی تامان اۉزارا منفعتلر اساسیده موجود اقتصادي و سودا امکانیتلریدن ثمرهلی فایدهلنیشی لازملیگینی تأکیدلهگن.
طالبلر تشقی ایشلر وزیرلیگینینگ یازیشیچه، روسيهنینگ مخصوص وکیلی «افغانستاندهگی سۉنگگی یوتوقلر»نی آلقیشلهگن و طالبلرنینگ گیاهوند مادّهلر بیلن کورهشینی اعتبارگه مالک دېب بهالهگن.
وزیرلیک بیاناتیگه کۉره، روسيهنینگ مخصوص وکیلی، شونینگدېک، بو بارهده اَیریم خلقارا تشکیلاتلر تامانیدن نشر قیلینگن «حساباتلرنی حقیقتگه ماس اېمس» دېب اتهگن.
طالبلر تشقی ایشلر وزیری هم طالبلر گیاهوند مادّهلرنی یېتیشتیریش، ایشلب چیقریش و ثاچاقیگه قرشی کورهشنی ایزچیل دوام اېتتیریشگه صادقلیگینی بیلدیرگن. اونینگ ایتیشیچه، بو بارهدهگی سعی-حرکتلر افغانستان و بوتون منطقه اوچون مهمدیر.
روسيه تشقی ایشلر وزیرلیگی حاضرچه اوشبو مملکت مخصوص وکیلی نینگ افغانستانگه سفری و اونینگ طالبلر تشقی ایشلر وزیری بیلن اوچرهشووی یوزهسیدن ایضاح بېرمهگن.
عینِ پیتده روسيه دنیاده طالبلر حکومتینی رسماً تن آلگن یگانه دولت حسابلنهدی. شونگه قرهمهی، روسيه رسميلری افغانستانده ترورچی گروهلر موجودلیگی و بو مملکتدن گیاهوند مادّهلر قاچاقینینگ عملگه آشیریلیشی یوزهسیدن بیر نېچه بار خواطر بیلدیرگن.
