ایران اسلام انقلابی حربي-دېنگیز کوچلری «هرمز بۉغازینینگ ناقانوني یۉنهلیشیده حرکتلنگن ایکّی نفر قاعدهبوزر نفت تانکری پارتلش عاقبتیده توختهب قالگن و یانهیاتگن حالده تشلب کېتیلگنینی» معلوم قیلدی.
ایرنا اخبارات آژانسینینگ خبر بېریشیچه، اسلام انقلابی پاسبانلری بوگون (سهشنبه، ۱۹ عقرب) بیر «سوپر تانکر» دېنگیز ماینیگه اوریلیشی عاقبتیده پارتلهگنینی بیلدیرگن. ایکّینچی تانکر اېسه امریکا اوردوسی نینگ قیرووچی اوچاقلری حمایهسی آستیده بۉلگن و ناقانوني یۉنهلیش آرقهلی یشیرینچه اۉتیشگه اورینگن. نتیجهده او هم «تصادمگه اوچرهب، کوچلی یانغین سببلی اۉز جاییده توختهب قالگن».
ایران اسلام انقلابی پاسبانلرینینگ حربي-دېنگیز کوچلری اوشبو تانکرلر برچه نویگتسیه و ایدېنتیفیکهتسيه تیزیملرینی اۉچیریب قۉیگنینی، پارتلشدن سۉنگ هرمز بۉغازینینگ جَنوبي قیرغاقلریده تشلب کېتیلگنینی و حاضر هم یانهیاتگنینی قۉشیمچه قیلگن.
ایران اسلام انقلابی پاسبانلری
امریکا و اسرایلنینگ ایرانگه قرشی هجوملری باشلنگنیدن سۉنگ هرمز بۉغازینی یاپگن اېدی. کارپوسنینگ تأکیدلشیچه، کېمهلر و نفت تانکرلری بۉغازدن فقط ایران حربي-دېنگیز کوچلرینینگ رخصتی همده اولر بېلگیلهگن یۉنهلیش بۉییچه خوفسیز اۉتیشی ممکن.
شونینگدېک، ایران هرمز بۉغازی نینگ اَیریم قِسملرینی دېنگیز ماینلری بیلن تۉلدیرگن. امریکا اوشبو ماینلرنی تازهلهگنینی بیلدیرهیاتگن بۉلسه-ده، ایران ییتکرمهلری هر کونی نفت تانکرلری نینگ دېنگیز ماینلریگه اوریلیشی بیلن باغلیق حالتلر حقیده خبر بېرماقده.
