ننگرهاردهگی منبعلرنینگ ایتیشیچه، بیر یاش ییگیت ایرانگه ناقانوني یۉل بیلن کېتهیاتگنیده یوز بېرگن ترافیک حادثهسی عاقبتیده اۉلگن.
منبع نینگ معلوماتیگه کۉره، بو ییگیت عادل آتلی بۉلیب، ننگرهار ولایتی نینگ اچین اولسواللیگیدهگی عبدالخیل منطقهسیدن اېدی. اونینگ دفن مراسمی سهشنبه کونی (۱۹ عقرب) توغیلیب اۉسگن قیشلاغیده اۉتکزیلگن.
منبعلر معلوماتیگه کۉره، بو ییگیت قشّاقلیک و اقتصادي معمالر سببلی ایشلش اوچون ایرانگه یۉل آلگن، بیراق یۉلده صادر بۉلگن ترافیک حادثهسی عاقبتیده حیاتدن کۉز یومگن. حادثه نینگ قچان و قهیېرده صادر بۉلگنی نامعلوم.
شونگه اۉخشش حادثهلر اوّل هم افغانستان فقرالری آرهسیدهگی ایش ایزلاوچیلر و مهاجرلر نینگ حیاتیگه ضامن بۉلگن.
افغانستاندهگی آغیر اقتصادي وضعیت و طالبان حکومتی تامانیدن جاري اېتیلگن چېکلاولر سببلی مملکت یشاوچیلرینینگ مهاجرتی آرتیب بارماقده.
افغانستانلیکلر نینگ کتّه قِسمی ایشلش اوچون ایرانگه بارهدی. ایران مملکتگه کیریش ویزهلرینی چېکلهگن. شونگه قرهمهی، آدملر ناقانوني مهاجرت یۉلینی تنلهماقده. بو یۉل اَیریم ایش ایزلاوچیلر نینگ حیاتیگه ضامن بۉلماقده.
جاري ییل یازیده نیمروز چۉللریده ۱۷ کیشی آچلیک و جزیرهمه عاقبتیده هلاک بۉلگن اېدی.
اَیریم افغانستانلیکلر ایران آرقهلی تورکيهگه، او یېردن اېسه اروپا مملکتلریگه یېتیب باریشنی مقصد قیلماقده. بو یۉل هم اۉته خوفلی و کۉپلب انسانلرنینگ عمریگه ضامن بۉلماقده.
یقینده تورکيه چېگرهسیده کمیده سکّیز کیشی افغانستان وطنداشی هلاک بۉلگنی حقیده خبر بېریلگن اېدی.
بوندن تخمیناً بیر آی اوّل هم ننگرهار ولایتینینگ بېش فقراسی تورکيه و ایران اۉرتهسیدهگی چېگره حدودیده هلاک بۉلگن اېدی.
