سمیع سادات رهبرلیگیدهگی «افغانستان ملي بیرلشگن جبههسی» غور ولایتیده ایکّی کیشینی «طالبلر اوچون جاسوسلیک قیلگنلیک» عیبی بیلن «قتل اېتگنینی» معلوم قیلدی.
مذکور جبهه تیناوون (سهشنبه، ۱۹ عقرب) کېچقورون نشر قیلگن بیاناتیده اوشبو ایکّی کیشی «طالبلر اوچون جاسوسلیک قیلگنلیک» عیبی بیلن قۉلگه آلینگنینی و جبهه حربي قاضیسی» تامانیدن اولرگه نسبتاً اۉلیم جزاسی چیقریلگنینی بیلدیرگن. حکم غور ولایتینینگ ایکّی جاییده اجرا اېتیلگن.
بو شخصلر «افغانستان ملي بیرلشگن جبههسی» تامانیدن قندهی ترتیبده محکمه قیلینگنی و کېینچهلیک اۉلیم جزاسیگه حکم اېتیلگنی نامعلوم. مذکور جبهه نینگ افغانستانده رسماً تن آلینگن بیرار قاضی یاکه محکمهسی موجود اېمس.
جبهه اوشبو واقعهگه عاید ویدیدلرنی هم نشر قیلگن. اولرده ایکّی کیشیگه میلتیقدن تۉغریدن-تۉغری اۉق اوزیلگنی و اولر نینگ یېرگه ییقیلگنی عکس اېتگن. اولردن بیری قۉللری آرقهسیگه باغلنگن حالده، ایکّینچیسی اېسه قۉللرینی بۉینی نینگ آرقه تامانیگه قۉیگن حالتده اۉققه توتیلگن.
«افغانستان ملي بیرلشگن جبههسی» طالبانگه قرشی حربي عملیاتلرینی باشلهگنیدن بویان حاضرگچه آلتی کیشینی «طالبان اوچون جاسوسلیک قیلگنلیک» عیبی بیلن «قتل اېتگنینی» معلوم قیلگن.
فرونت جبهه بیاناتیده شوندهی دېییلهدی: «افغانستان ملي بیرلشگن جبههسینینگ محکمه ترتیب-قاعدهلریگه موافق، دشمن بیلن همکارلیک قیلیش جزاسی اۉلیمدیر. اعضالر، منبعلر و فرونت جبهه معلوماتلرینینگ خوفسیزلیگینی تأمینلش مقصدیده جبهه استخبارات بۉلیمی دشمن جاسوسلرینی انیقلش، قۉلگه آلیش و یۉق قیلیشگه علیحده اعتبار قرهتهدی».
بو حالت خلقارا قانونلرده اۉلیم جزاسی کېسکین چېکلنگن، بیرلشگن ملتلر تشکیلاتی و اونینگ انسان حقوقلری بۉییچه تشکیلاتلری اېسه بوندهی جزانی «انسانيلیککه ضد جزا» دېب حسابلهیاتگن بیر پیتده یوز بېرماقده.
