تورکيه جمهور رییسی رجب طیب اردغان و قطرتمیم بن حمد آل ثانی بوگون (جمعه،۲۲ عقرب) استانبول شهریده مدافعه کېلیشووینی امضالهدی.
تورکيه حکومتی علاقه لر اداره سی بیاناتیده اوشبو مدافعه کېلیشووی «ایکّی تامانلهمه» اېکنینی معلوم قیلدی.
رجب طیب اردغان مذکور کېلیشوو ایکّی دولت اۉرتهسیدهگی مناسبتلرگه ینگی یۉنهلیش بېریشینی تأکیدلهدی. حاضرچه اوشبو مدافعه کېلیشووی نینگ تفصیلاتلری آشکار اېتیلمهگن.
اردغان و تمیم بن حمد آل ثانی استانبولدهگی دولماباغچه جمهورلیک سراییده قرارگاهیده اوچرهشدی. اوچرهشوو دوامیده تامانلر ایکّی تامانلهمه مناسبتلر، شونینگدېک، منطقوي و خلقارا واقعهلر یوزهسیدن فکر المشدی همده مدافعه کېلیشووینی امضالهدی.
تورکيه حکومتی علاقه لر اداره سی معلوم قیلیشیچه، اردغان ایکّی دولت اۉرتهسیده امضالنگن مدافعه کېلیشووینی یقین مناسبتلرنی مستحکملش یۉلیدهگی مهم قدم صفتیده بهالهگن.
شونینگدېک، او اۉتگن ییلی کوچگه کیرگن سودا و اقتصادي شریکلیک کېلیشووی ایکّی دولتنی اۉزارا سودا حجمینی آشیریش بۉییچه بېلگیلنگن عمومي مقصدلرگه یقینلشتیرگنینی ایتگن.
بیاناتگه کۉره، اردغان انرژی و مدافعه صناعتی ساحهلریدهگی همکارلیکنی کېنگهیتیریش مهملیگینی تأکیدلهگن. شونینگدېک، تورکيه و قطر فارس کۉرفزی منطقهسیده تۉقنهشوولر قَیته باشلنیشی نینگ آلدینی آلیش اوچون بیرگهلیکدهگی سعی-حرکتلرینی دوام اېتتیریشینی بیلدیرگن.
او، شونینگدېک، ملاقات اوچون شرایط یرهتیش، تینچلیکنی تأمینلش و ماجرالشهیاتگن تامانلرنی کېلیشماوچیلیکلرنی دیپلوماتیک یۉللر بیلن حل اېتیشگه اوندهش ضرورلیگینی تأکیدلهگن.
غزادهگی وضعیت، اسرایل هجوملری و منطقهدهگی گومانیتار احوال، سوريهده مناسبتلرنی نارمهللشتیریش جریانی همده لیويهدهگی سۉنگگی واقعهلر هم ایکّی دولت رهبرلری محاکمه قیلگن موضوعلر قطاریدن جای آلگن.
تورکيه و قطر اۉرتهسیدهگی مدافعه کېلیشووی تورکيه یقینده پاکستان و سعوديه عربستانی بیلن «مکه مدافعه پیمانی»نی امضالهگن بیر پیتده توزیلدی. اوشبو مدافعه پکتیگه کۉره، اوچ دولتدن بیریگه قیلینگن هجوم اوچهلهسیگه قیلینگن هجوم صفتیده بهالنهدی. اتفاق اعضالری بیر-بیری نینگ حاکمیتی و حدودي یخلیتلیگینی حمایه قیلیش مجبوريتینی آلهدی.
