طالبلر رهبری هبت الله آخوندزاده کابل بیلیم یورتیده سۉزلهگن نطقیده افغانستاننینگ برچه اهالیسی حنفی مذهبیگه اېرگشیشینی ایتدی.
اونینگ طالبلر عامهوي اخبارات واسطهلری تامانیدن بوگون (سهشنبه، ۲۶ عقرب) اعلان قیلینگن ۹۰ دقیقهلیک نطقیده ایتیلیشیچه، شریعتگه کۉره، «امام یۉلنی تنلهیدی و شو اساسده افغانستانده برچه آدملر حنغي مذهبیگه اېرگشهدی، شافیع مذهبیگه عمل قیلیش اېسه ناجایز حسابلنهدی».
طالبلر رهبری، شونینگدېک، خلق یگانه فکر و یگانه فیقه یۉنهلیش اطرافیده بیرلشیشی کېرهکلیگینی تأکیدلهدی.
بوندن اوّل هم طالبلرنینگ باشقه رسميلری، جملهدن، اوشبو گروه نینگ عالي تحصیلات وزیری افغانستانده فقط بیرته مذهب موجودلیگینی ایتگن اېدی.
تخمینلرگه کۉره، افغانستان جمعیتی نینگ کتّه قِسمینی سنّی مسلمانلر و حنفی ي مذهبی وکیللری تشکیل اېتهدی. بیراق مملکت اهالیسی دیني جهتدن رنگ-برنگ ترکیبگه اېگه.
سننیلردن کېین افغانستانده اېنگ کۉپ طرفدارلرگه اېگه مذهب شیعهلیک حسابلنهدی. تخمینلرگه کۉره، افغانستان اهالیسی نینگ قریب ۳۰ فایزینی شیعه مذهبی وکیللری تشکیل اېتهدی.
شیعه اهالینینگ اساسي قِسمینی افغانستان هزارهلری تشکیل قیلهدی، بیراق مملکتدهگی باشقه اېتنیک گروهلر آرهسیده هم اوشبو مذهبگه اعتقاد قیلووچیلر بار.
افغانستاننینگ اوّلگی حکومت دوریده جعفريه مذهبی رسماً تن آلینگن و شیعهلر اوچون «شخصي حالت تۉغریسیده»گی قانون قبول قیلینگن اېدی. اوشبو قانون اساسیده مذکور مذهب وکیللری نینگ حقوقي و شخصي مسألهلری حل اېتیلردی.
طالبلر حاکمیتگه قَیتگنیدن سۉنگ شیعه مذهبینینگ رسمي تن آلینیشی و «شخصي حالت تۉغریسیده»گی قانوننی بېکار قیلدی.
شیعهلر طالبلر تامانیدن جاري اېتیلهیاتگن دیني چېکلاولرنی تنقید قیلیب کېلهدی.
سۉنگگی بېش ییل ایچیده طالبلرتامانیدن شیعه اسماعيلر جماعهسیگه اۉز مذهبینی اۉزگرتیریش اوچون باسیم اۉتکزیلهیاتگنی حقیده خبرلر ترقهلگن.
یقینده طالبغ اَیریم ولایتلرده شیعه روحانيلرینی نامعلوم سببلرگه کۉره حبسگه آلیب، قماققه جایلشتیرگن.
بو گروه هراتده «فاظمه» ماتم مراسملرینی اۉتکزگنی اوچون ایکّی نفر شیعه روحانيسینی حبسگه آلگن. خبرلرگه کۉره، اولردن باشقه بوندهی مراسملرنی اۉتکزمسلیک حقیده تیلخط آلینگن.
شونینگدېک، طالبلر باميان ولایتیده شیعه دیني مکتبلری طلبهلریگه مددمعاشلر ترقهتهیاتگن پیتده تۉرت نفر شیعه روحانيسینی حبسگه آلگن.
