طالبان سۉزلاوچیسی ذبیحالله، بو گروهنینگ تورکيهنینگ استانبول شهریده پاکستان بیلن اۉتکزگن مذاکرهلری هېچ قندهی نتیجهگه اېریشمهگنینی معلوم قیلدی. پاکستان رسميلری هم مذاکرهلر باشی بېرک کۉچهگه کیرگنینی تصدیقلهگن.
طالبلر نمایندهسی بوگون (شنبه، ۱۷ عقرب) اعلان قیلگن بیاناتیده، «پاکستان هیاتینینگ مسوولیتسیز مناسبتی و همکارلیک قیلمسلیگی سبب، اسلام امیرلیگی نینگ یخشی نیتیگه و واسطهچیلرنینگ سعی-حرکتلریگه قرهمهی، هېچ قندهی نتیجهگه اېریشیلمهدی» دېگن.
او تورکيه و قطرگه مذاکرهلرگه مېزبانلیک و واسطهچیلیک قیلگنی اوچون منّتدارچیلیک بیلدیریب، «طالبلر نمایندهلری رهبریتنینگ مخصوص کۉرسهتمهسی بیلن ۶-۷ نوامبر کونلری استانبولده صمیمي نیت و صلاحیت بیلن قتنهشدیلر دېیه تاکیدلهدی. امید قیلینگن اېدیکی، بو سفر پاکستان تامانی اۉز رهبرلری بیلن مصلحتلشگن حالده مسوولیتلی روحده و یخشی نیت بیلن مسألهنی یېچیش اوچون حقیقتگه یقین و عملگه آشیریلهدیگن پیشنهادلر بیلن مذاکرهگه کیرهدی.»
مجاهدنینگ سۉزلریگه کۉره، «افسوسکی، مذاکرهلر دوامیده پاکستان تامانی اۉز خوفسیزلیک مسوولیتینی بوتونلهی افغانستان حکومتیگه یوکلشگه اوریندی، اما اۉز تامانیدن نه افغانستان خوفسیزلیگی، نه اۉز خوفسیزلیگی بۉییچه هېچ قندهی مجبوريتنی قبول قیلیشگه تیارلیک کۉرسهتمهدی.»
طالبلرینه اۉزی نینگ «اساسي موضعینی» تکرارلب، هېچ بیر مملکتگه افغانستان توپراغیدن باشقه دولتگه قرشی فایدهلنیشگه رخصت بېرمسلیکلرینی، شونینگدېک، هېچ بیر دولتگه افغانستان نینگ، مستقللیگی و خوفسیزلیگیگه قرشی حرکت یاکه قۉللب-قوّتلش امکانینی بېرمسلیکلرینی تأکیدلهگن.
مجاهدنینگایتیشیچه، «پاکستان مسلمان خلقی افغانستانلیکلرنی ایناغهسی حسابلنهدی» و طالبان اولرنینگ تینچلیگی و فراوانلیگینی ایستهیدی همده اۉز امکانیتلری چهارچوبهسیده همکارلیک قیلهدی.
طالبلر سۉزلاوچیسی، بو گروه «افغانستان خلقینی و یورتینی حمایه قیلیشنی دیني بورچ دېب بیلهدی» و «هر قندهی تجاوزگه قرشی حمایه قیلهدی»، دېیه قۉشیمچه قیلگن.
پاکستان عامهوي اخبارات واسطهلرینینگ خبر بېریشیچه، طالبان و پاکستان اۉرتهسیدهگی استانبولدهگی مذاکرهسی جمعه کونی هېچ قندهی نتیجهسیز یکونلنگن و پاکستان هیاتی، «آیاسآی» رهبری باشچیلیگیده، وطنگه قَیتگن.
پاکستان مدافعه وزیری خواجه آصف هم سۉنگگی باسقیچدهگی مذاکرهلر باشی بېرک کۉچهگه کیرگنینی و یقین آرهده ینگی مذاکرهلر رېجهلشتیریلمهگنینی تصدیقلهگن.
پاکستان اخبارات و نشرات وزیری عطالله طرار تورکيه و قطرنینگ واسطهچیلیک رۉلینی اعتراف اېتیب، شوندهی دېگن: «پاکستان اۉز موضعیده قطعي، یعنی تروریزمنی نظارت قیلیش مسوولیتی افغانستان ذمّهسیدهدیر.»
او: «پاکستان افغانستان خلقیگه نسبتاً هېچ قندهی عداوتی یۉق، اما افغانستان طالبان رژیمینینگ افغانستان خلقی و قۉشنی مملکتلرنینگ منفعتلریگه ضرر یېتکزهدیگن حرکتلرینی قۉللب-قوّتلهمهیدی دېگن.»
اونینگ قۉشیمچه قیلیشیچه، «پاکستان اۉز خلقینینگ خوفسیزلیگی و یېر بوتونلیگینی سقلب قالیش اوچون ضرور بۉلگن برچه چارهلرنی کۉریشده دوام اېتهدی.»
پاکستاننینگ تأکیدلشیچه، افغانستاندهگی طالبان تحریک طالبان پاکستان (تیتیپی) جنگریلریگه باشپناه بېرگن و بو گروه افغانستان توپراغیدن پاکستانگه قرشی حرکت قیلماقده.
پاکستان رسميلری طالباندن تیتیپیگه قرشی چاره کۉریشنی بیر نېچه بار طلب قیلگن.
پاکستان اوردوسی اېسه تیتیپینی یۉق قیلیش مقصدیده افغانستانگه بیر نېچه مرته هوا هجوملری اویوشتیرگن. سۉنگگی هجوملر چېگره حدودلرده طالبان بیلن پاکستان قۉشینلری اۉرتهسیده تۉقنهشوولرگه سبب بۉلگن. بیر نېچه کونلیک جنگلردن سۉنگ، قطر و تورکيه واسطهچیلیگیده اۉت آچیشنی تۉختهتیش و مذاکرهلر باشلنگن، بیراق حاضرچه طالبان و پاکستان اۉرتهسیدهگی اوچینچی باسقیچلی مذاکرهلر نتیجهسیز یکونلنگن.
