طالباننینگ سۉزلاوچیسی ذبیحالله مجاهدنینگ ایتیشیچه، پاکستان طالبانی حرکتی (تیتیپی) «پاکستان اوردوسینینگ ناتۉغری سیاستلری» نتیجهسیده پیدا بۉلگن و افغانستان طالبانی بیلن هېچ قندهی علاقهسی یۉق.
او بوگون (شنبه، ۱۷ عقرب) مطبوعات انجمنیده تیتیپی پاکستانگه عاید اۉز معماسی اېکنینی و پاکستاننینگ بو مسألهنی اۉزی حل قیلیشی کېرهکلیگینی تأکیدلهدی.
مجاهد، پاکستان اوردوسیدهگی معین بیر چهارچوبه «افغانستانده مستحکم حکومت و تینچلیکنی» ایستهمهیدی و تیتیپینی بهانه صفتیده ایشلتماقده دېب ادعا قیلگن.
او، «اوشبو چهارچوبهده اسلامی امیرلیک (طالبان رژیمی)گه نسبتاً ناتۉغری عیبلاولر کېلتیرماقده و دنیاگه تیتیپی معماسی امیرلیک کېلیشی بیلن پیدا بۉلگن دېب کۉرستماقده، حالبوکه اولر۲۰۰۲ ییلدن بېری موجود و سبب پاکستان اوردوسی نینگ ناتۉغری سیاستلری بۉلدی. اۉشه پیتده اولر امریکا بیلن اتفاق توزیب امریکا وزیرستان منطقهده درن هجوملرینی عملگه آشیریشگه رخصت بېردی و اۉزلری هم مظلوم وزیرستان اهالیسی بیلن دشمنلیک باشلهدی.»
طالبان سۉزلاوچیسی، طالبان حاکمیتگه قَیتگچ، اولر پاکستان طالبانی بیلن پاکستان حکومتی اۉرتهسیده واسطهچیلیک قیلیب، ایکّی تامان اۉرتهسیده مذاکرهلر اۉتکزیشنی تأمینلهگن. نتیجهده وقتینچه تینچلیک اۉرنهتیلدی و مسأله حل قیلینیشگه یقین اېدی، اما پاکستان اوردوسیدهگی «معین دایره» مذاکرهلرنی سبوتاژ قیلگن.
پاکستان اېسه طالبان حاکمیتگه قَیتگچ، تیتیپی هجوملری آشگنینی بیلدیرهدی و طالباننی تیتیپینی قۉللشده عیبلهیدی. بو مسأله سۉنگگی تۉرت ییل دوامیده کابل و اسلامآباد اۉرتهسیدهگی کېسکینلیکنینگ مرکزیده بۉلگن.
یقینده ایکّی تامان چېگروي تۉقنهشوودن سۉنگ تینچلیک و مذاکرهلرنی باشلهدی، اما حاضرگچه نتیجه چیقمهگن. آخرگی مذاکرهلر استانبول، تورکيهده اۉتکزیلدی، نتیجهسیز یکونلندی و تامانلر بیر-بیرینی ایشنی تۉسیش بیلن عیبلهدی.
طالبان سۉزلاوچیسی بوگونگی مطبوعات انجمنیده، «پاکستان هیاتینینگ مسوولیتسیزلیگی و همکارلیک قیلمسلیگی سببلی، اسلامي امیرلیکنینگ یخشی نیتی و واسطهچیلرنینگ سعی-حرکتلریگه قرهمهی، هېچ قندهی نتیجهگه اېریشیلمهدی.»
اما پاکستان اخبارات و نشرات وزیری عطاالله ترر ایتگن. «پاکستان حلی هم بو مسألهده اۉز موضع افغانستان حدودیدن کېلهیاتگن ترورنی نظارت قیلیش مسوولیتی افغانستانگه تېگیشلی، دېگن فکریده قطعي توریبدی.»
