کابلدهگی سردار محمد داوودخان نامیدهگی ۴۰۰اۉرینلی حربي شفاخانه داکترلری بیر عیال بېمارنینگ آشقازانیدن کتّه حجمدهگی ساچ تۉدهسینی موفقیتلی جراحلیک عملیاتی آرقهلی آلیب تشلهدی.
طالبان قوراللی کوچلری باش قوماندانلیگی طبیات باشقرمهسی چهارشنبه آقشامی (۲۷ جوزا) ترقهتگن بیاناتگه کۉره، کسل هلمند ولایتیدن اوشبو حربي شفاخانهگه مراجعت قیلگن.
معلوم قیلینیشیچه، عیال کم اوچرهیدیگن «تریکوبیزوار» کسللیگیگه چهلینگن بۉلیب، بو حالت آشقازانده ساچلرنینگ ییغیلیب قالیشی بیلن توصیفلنهدی.
داکترلرنینگ ایتیشیچه، کسللیک انچه رواجلنگن باسقیچگه یېتگن و اولکن حجمدهگی ساچ تۉدهسی بېمارنینگ بوتون آشقازانی همده ایچکلری نینگ کتّه قِسمینی اېگهللب آلگن اېدی.
جراحلیک عملیاتی موفقیتلی اۉتگن و ساچ تۉدهسی آشقازان همده ایچکلردن تۉلیق چیقریب تشلنگن.
عملیاتدن کېین بېمارنینگ احوالی یخشی و قانیقرلی دېب بهالنگن.
داکترلرنینگ تأکیدلشیچه، بېمار بوندن اوّل مملکتدهگی تورلی شفاخانهلرگه مراجعت قیلگن، بیراق انیق تشخیص و ثمرهلی دوالنیشگه اېریشه آلمهگن.
کېینچهلیک داوودخان شفاخانهسی متخصصلری باتفصیل تېکشیروولر و اندوسکوپی آرقهلی کسللیکنی انیقلب، بېمارنی جراحلیک عملیاتیگه آلگن.
«تریکوبیزوار» یاکه «سندرم راپونزل» جوده کم اوچرهیدیگن کسللیک بۉلیب، عادتده «تریکوتیلومانیا» (ساچنی یولیب تشلش عادتی) و «تریکوفاژی» (ساچ یېییش عادتی) کبی روحي بوزیلیشلر نتیجهسیده یوزهگه کېلهدی.
بو حالت آدم اۉزی نینگ یاکه باشقهلر نینگ ساچینی منتظم روشده یوتگنده صادر بۉلهدی. ساچلر هضم بۉلمهگنی سببلی طعام هضم قیلیش تیزیمیده تۉپلنیب بارهدی، بیر-بیریگه چیرمشیب، آشقازان یاکه ایچکلرده قتّيق تۉده حاصل قیلهدی.
وقت اۉتیشی بیلن بو ساچ تۉدهسی کتّهلشیب، آشقازان و ایچکلرنی قمرهب آلهدی. نتیجهده قارین آغریغی، کۉنگیل اینِشی، قوسیش، اشتها نینگ یۉقالیشی، تېز وزن یۉقاتیش کبی علامتلر پیدا بۉلهدی. آغیر حالتلرده اېسه ایچک توتیلیشی یاکه طعام هضم قیلیش تیزیمیده قان کېتیشی کوزهتیلیشی ممکن.
