جهان ساغلیقنی سقلش تشکیلاتی افغانستانده پولیو کسللیگینینگ ینه ایکّی ایجابي حالتی قید اېتیلگنینی معلوم قیلدی. شو بیلن مملکتده جاري ییل باشیدن بویان انیقلنگن حالتلر سانی آلتیتهگه یېتدی.
جهان ساغلیقنی سقلش تشکیلاتی گزارشیگه کۉره، ینگی ایکّی حالت کنر ولایتینینگ نری اولسواللیگی و هلمند ولایتی نینگ نهرسراج اولسواللیگیده ماس روشده ۱۴-اپرېل و ۷-می کونلری قید اېتیلگن.
تشکیلات معلوماتلریگه کۉره، ۲۰۲۶-ییلده افغانستانده حاضرگچه پولیو ویروسنینگ اطراف-محیط نمونهلریدهگی۳۴ته حالتی انیقلنگن.
جهان ساغلیقنی سقلش تشکیلاتی آمارلریگه اساسن،۲۰۲۵-ییلده افغانستانده جمعی۲۱ ته انساني و۹۴ ته اطراف-محیطگه عاید ایجابي پولیو حالتی قید اېتیلگن اېدی.
افغانستان و پاکستان حاضرگچه بالهلر فلجی ویروسی تۉلیق یۉق قیلینمهگن دنیادهگی یگانه ایکّی مملکت حسابلنهدی.
گزارشگه کۉره، جاري ییلده پاکستانده 3 ته انساني و۹۰ ته اطراف-محیطگه عاید ایجابي حالت قید اېتیلگن۲۰۲۵ییلده اېسه بو مملکتده۳۱ ته انساني و۶۵۱ ته اطراف-محیطگه عاید حالت انیقلنگن.
بالهلر فلجی یوقوملی ویروسلی کسللیک بۉلیب، اساسن بېش یاشگچه بۉلگن بالهلرنی ضررلهیدی. کسللیک افلاسلنگن آزیق-طعام، سوو یاکه یقین ملاقات آرقهلی یوقهدی و دایمي فلجلیک یاکه اۉلیمگه سبب بۉلیشی ممکن.
بالهلر فلجی نینگ دواسی موجود اېمس، بیراق خوفسیز و ثمرهلی واکسینلر اونینگ آلدینی آلیشی ممکن.
۱۹۸۸ییلده پولیو بوتون دنیاده یۉق قیلیش بۉییچه سعی-حرکتلر باشلنگنیدن بېری کسللیک حالتلری۹۹ فایزگه کمهیگن. شونگه قرهمهی، ویروس نینگ ترقهلیشی افغانستان و پاکستانده هنوز دوام اېتماقده.
هر ایکّی مملکتده اېملش دستورلری جدّي تۉسیقلرگه دوچ کېلماقده.
خوفسیزلیک معمالری و واکسین حقیدهگی ناتۉغری قرهشلر افغانستان همده پاکستاندهگی اېملش کمپنیلریگه سلبي تأثیر کۉرستماقده.
طالبلر حاکمیتنی قۉلگه کیریتیشیدن آلدین هم اۉز نظارتیدهگی حدودلرده اېملش ایشلری آلیب باریلیشیگه تۉسقینلیک قیلگن اېدی.
مذکور گروه حاضر هم اویمه-اوی اېملش کمپنیلرینی تعقیقلهگن همده بو کمپنیلرده عیاللرنینگ اشتراکیگه چېکلاولر جاري اېتگن.
