تمدن تلویزیونینینگ مدیر مسوولی محمد رحمتی همده بو تلویزیوننینگ باشقه بیر خادیمی محمد رضا احسانی طالبلرنینگ عدلیه وزیرلیگی بویروغی بیلن حبسگه آلینگنینی معلوم قیلدی.
تلویزیون بوگون (شنبه، ۶-سرطان) اۉزینینگ رسمي فیسبوک صحیفهسیده اعلان قیلگن بیاناتیده، اولر آلتی کون آلدین قۉلگه آلینگنی و حاضرده یکّه ترتیبدهگی تورمهده سقلنهیاتگنینی بیلدیردی.
تمدن تلویزیونی تېگیشلی ادارهلردن اوشبو شخصلرنی زودلیک بیلن آزاد اېتیشنی سۉرهب، اولر «هېچ قندهی محکمه حکمیسیز و اولرگه نسبتاً بیرار عیبلاو اعلان قیلینمهگن حالده» حبسگه آلینگنینی تأکیدلهدی.
بیاناتده ایتیلیشیچه، تلویزیون مسوول محررینینگ ساغلیغی قماقده سقلنیشگه ماس اېمس و اگر اونینگ سلامتلیگیگه بیرار ضرر یېتسه، بو نینگ بېواسطه جوابگرلیگی اساسسیز روشده حبسگه آلیش بویروغینی بېرگن اداره ذمّهسیده بۉلهدی.
بیاناتگه کۉره، اوشبو ایکّی خادم طالبان عدلیه وزیرلیگیگه علاقهدار کوچلر تمدن تلویزیونی باش بناسیگه باستیریب کیریب، نشراتنی تۉختهتیشی و بنانی مُهرلشیدن ایکّی کون اوّل حبسگه آلینگن.
اۉتگن هفته سهشنبه کونی توش پیتی طالبان عدلیه وزیرلیگیگه علاقهدار کوچلر تمدن تلویزیونی مرکزي بناسیگه باستیریب کیریب، تلویزیون نشراتینی تۉختهتگن و ادارهنی مُهرلب یاپگن اېدی.
طالبلرنینگ عدلیه وزیرلیگی، شونینگدېک، کابلدهگی خاتم النبیین دیني علمي مرکزینی هم یاپگن.
تمدن تلویزیونی و خاتم النبیین دیني علمي مرکزی مسووللرینینگ تصدیقلشیچه، طالبلر اوشبو ایکّی مرکزنی اولرنینگ بنالری دولت یېرلریده قوریلگنی حقیدهگی دعوا بیلن یاپگن. بیراق مذکور ایش حاضر طالبلرنینگ مخصوص محکمهسیده کۉریب چیقیلماقده و حلی یکوني حکم چیقریلمهگن.
