اطلاعات روزدگزېتهسی اۉزبېک تیلینینگ ملي کونی مناسبتی بیلن اۉزبېک تیلیدهگی بۉلیمینی فعالیتگه توشیردی. اۉزبېک تیلی افغانستان ایچیده و باشقه مملکتلرده میلیونلب سۉزلاوچیلرگه اېگه بۉلیب، نهفقط بوگون میلیونلب افغانستان یشاوچیلرینینگ حیاتی و مدنیتینینگ تیلی حسابلنهدی، بلکه اۉتمیشده هم کېنگ تاریخي حدودنینگ تفکر و مدنیت میراثینی تشووچی اساسي تیل بۉلگن. بیراق بو بای تاریخ و مدني میراثگه قرهمهی، اۉزبېک تیلی رسمي علاقه، ملي تعلیم تیزیمی و عامهوي اخبارات واسطهلری ساحهلریده کۉپینچه چېکّه اۉرینده قالیب کېلگن.
افغانستاندهگی کۉپینچه عامهوي اخبارات واسطهلریده ینگیلیکلر، تحلیللر، گزارشلر و باشقه توردهگی محتوالر اساسا ایکّی رسمي تیل دري (فارسي) و پشتو تیللریده چېکلنگن. تعلیم مؤسسهلریده مکتبدن تارتیب بیلیم یورتلریگچه هم اۉزبېک تیلی عادتده موجود اېمس. نتیجهده، آنه تیلی اۉزبېکچه بۉلگن آدملر نهفقط اۉز آنه تیللریدن باشقه تیلده تعلیم آلیشگه، بلکه اخبارات و عامهوي ملاقاتده هم اۉزگه تیلدن فایدهلنیشگه مجبور بۉلهدیلر. بو جریان شوندهی حالتنی یوزهگه کېلتیرگنکی، افغانستان جمعیتینینگ بای اجتماعي خیلمه-خیللیگی عامهوي علاقه واسطهلریده یېترلیچه عکس اېتمهیپتی. نتیجهده، کتّه بیر قِسم اهالی آرهسیده مدني چېتلب قالیش حسی و معنوي-عدالتسیزلیک تویغوسی کوچهیگن.
شو باعث، عامهوي اخبارات واسطهلری فقطگینه خبر یېتکزووچی ادارهلر اېمس اولر، خواهلهسین یاکه یۉق، جماعتچیلیک فکری و اجتماعي اۉزلیکنی شکللنتیریشده مهم رۉل اۉینهیدی. شو سببدن اطلاعات روز گزېتهسی فارسي و پشتو تیللری بیلن بیر قطارده اۉزبېک تیلیدهگی بۉلیمنی هم تشکیل اېتیشگه قرار قیلدی. بو تشبث، بیر تاماندن، افغانستان جمعیتینینگ اۉزبېک تیلیده سۉزلشووچی قتلمیگه آواز بېریش یۉلیده کیچیک، اما اهمیتلی بیر قدمدیر.
باشقه تاماندن اېسه، حاضرگی شرایطده طالبان حکومتی مملکتدهگی فرهنگی خیلمه-خیللیک و رنگ-برنگلیکنی یۉق قیلیشگه اورینهیاتگن بیر پیتده، بو ایش افغانستاندهگی فرهنگی و تیل جهتیدن بای طرفه جمعیتنی سقلب قالیش ضرورلیگینی ینه بیر بار تأکیدلهیدی. یگانه گروه حکمرانلیگی آستیدهگی زۉرآور بیرخیللشتیریش سیاستیگه قرشی، بو تشبث اجتماعي و مدني خیلمه-خیللیککه حرمت بجا کېلتیریش یۉلیده مهم قدم حسابلنهدی.
اطلاعات روز گزېتهسیده اۉزبېک تیلیدهگی بۉلیمنی فعاللشتیریش، البته، فقط رمزي بیر قدم اېمس. بو ایش افغانستاننینگ اۉزبېکلر یشاوچی منطقهلریده اخبارات سوادخوانلیگی و فرهنگی اۉسیشگه هم بېواسطه تأثیر کۉرسهتهدی. آنه تیلی آرقهلی اخبارات آقیمیگه کیرگن بالهلر، یاشلر، عیاللر و اېرککلر ینگیلیکلر همده عامهوي اخبارات محتوالرینی اۉقیش، یازیش و تحلیل قیلیش کۉنیکمهلرینی یخشیراق اۉزلشتیرهدیلر. اولرنینگ عامهوي اخبارات واسطهلریده فعالراق اشتراک اېتیشی اېسه اولرگه اۉزبېک تیلی و ادبیاتینی سقلش همده رواجلنتیریشگه کتّه حصه قۉشیش امکانینی بېرهدی. شو یۉل بیلن اولر بو تیلدهگی عامهوي ملاقات میدانی تارهییب و اونوتیلیش خوفیگه توشیب قالمسلیگیگه یاردم بېرهدیلر.
بیر یازووچی: «اۉزبېک تیلی ملي کونینی نشانلشنینگ اۉزی کفایه اېمس، بو تیلده، شو تیل آرقهلی و شو تیل اوچون ایشلش کېرهک.» دېب یازگن اېدی و بو سۉزلر، البته، تۉغری ایتیلگن. بیز برچه یازووچیلرنی، تدقیقاتچیلرنی، ژورنالیستلرنی همده اۉزبېک جمعیتینینگ اجتماعي فعاللرینی اطلاعات روز گزېتهسینینگ اۉزبېک تیلیدهگی بۉلیمینی ینهده بایراق و فایدهلیراق قیلیش یۉلیده بیز بیلن همکارلیککه چارلهیمیز. خبر و گزارشلردن تارتیب مقاله، تحلیل، خاطره، تنقید و شونینگدېک صورتلر، ویدیولر و باشقه ایجادي اثرلر بولرنینگ برچهسی اطلاعات روزنینگ بو ینگی اۉزبېکچه بۉلیمینی مضمون بۉییچه باییتیب، ینه-ده مستحکملهی آلهدی.
