طالبلرنینگ ننگرهار و سمنگاندهگی محلي مسووللری اوشبو ولایتلرده یوز بېرگن ایکّی ترافیک حادثهسی عاقبتیده کمیده ۱۲ کیشی جان بېرگن، ینه ۱۵ کیشی یرهلنگنینی معلوم قیلدی.
طالبلرنینگ ننگرهار ولایتی امنیه قوماندانلیگینینگ معلوم قیلیشیچه، بوگون (شنبه، ۲۰-سرطان) ساعت۹:۳۰ده پچیراگام اولسواللیگی «داتسون» روسوملی موتر اغدریلیب کېتیشی عاقبتیده۹ کیشی هلاک بۉلگن، ینه۸کیشی جراحت آلگن.
طالبلرنینگ ننگرهار ولایتی امنیه قوماندانلیگی مطبوعات سۉزلاوچیسی سید طیب حمادنینگ ایتیشیچه، هلاک بۉلگنلر آرهسیده تۉرت کیشی عیال، ایکّی اېرکک و اوچ باله بار.
اونینگ قۉشیمچه قیلیشیچه، جراحتلنگنلر دوالنیش اوچون رودات اولسواللیگی شفاخانهسیگه یېتکزیلگن.
شونینگدېک، طالبلرنینگ سمنگان ولایتی امنیه قوماندانلیگی سمنگان-بلخ ترافیک یۉلیده یوز بېرگن ترافیک حادثهسی عاقبتیده اوچ کیشی جان بېرگنی، ینه یېتّی کیشی جراحت آلگنینی معلوم قیلگن.
طالبلرنینگ سمنگان ولایتی امنیه قوماندانلیگی مطبوعات سۉزلاوچیسی حشمتالله رحمانينینگ ایتیشیچه، حادثه بوگون ولایتنینگ حضرت سلطان اولسواللیگیده یوز بېرگن.
اونینگ سۉزلریگه کۉره، حادثهده ایکّی ته «سراچه» روسوملی موتر اۉز ارا تۉقنشگن و هلاک بۉلگنلر آرهسیده بیر عیال هم بار.
رحمانينینگ ایتیشیچه، جراحتلنگنلر همده هلاک بۉلگنلرنینگ جسدلری سمنگان ولایت شفاخانهسیگه کۉچیریلگن.
رسميلرگه کۉره، مذکور ترافیک حادثهلریگه هیداوچیلرنینگ احتیاطسیزلیگی سبب بۉلگن.
