پاکستان ایران و امریکا اۉرتهسیدهگی حربي تۉقنهشوولر کوچهیگنیدن خواطر بیلدیریب، تامانلرنی زۉروانلیکنی تۉختهتیش و اسلام آباد کېلیشووی اساسیده مذاکرهلرنی قَیته باشلشگه چقیردی.
پاکستان تشقی ایشلر وزیرلیگی سۉزلاوچیسی طاهر اندرابي بوگون، پنجشنبه، ۲۵-سرطان، مطبوعات انجمنیده شوندهی دېدی:
“کېلیشوونی عملگه آشیریش قیینچیلیکلرگه دوچ کېلهیاتگن بۉلسه-ده، پاکستان برچه تامانلرنی زۉروانلیکنی تۉختهتیش و اسلام آباد کېلیشووی اساسیده تخنیکي درجهدهگی مذاکرهلرنی قَیته باشلشگه اوندهشده دوام اېتهدی.”
اونینگ سۉزلریگه کۉره، پاکستان منطقهدهگی وضعیتنی یقیندن کوزهتماقده و نزاعلرنی حل اېتیش نینگ اېنگ مقبول یۉلی مذاکره اېکنیگه ایشانهدی.
اندرابي شونینگدېک، پاکستان نینگ واسطهچیلیک سعی-حرکتلری دوام اېتهیاتگنینی همده هرمز بۉغازیدهگی وضعیت تېز آرهده معیارلشیشیگه امید بیلدیرگنینی ایتدی.
ایران و امریکا جاري ییل نینگ۱۷جون کونی پاکستان واسطهچیلیگیده اوروشنی یکونلش بۉییچه اسلام آباد کېلیشووینی الکترون شکلده امضالب، برچه جبههلرده حربي حرکتلرنی تۉختهتیشگه کېلیشگن اېدی.
بیراق سۉنگگی کونلرده هرمز بۉغازی باشقرووی بۉییچه کېلیشماوچیلیکلر سبب ایکّی دولت ینه اۉز ارا هجوملرنی باشلهدی. ایران رسميلری ایسه اسلام آباد کېلیشووی عملده اېندی موجود اېمسلیگینی معلوم قیلگن.
