گزارشگر: اسلامالدین جرأت
دستلبکی اېرتهلبکی سپورتنی قیلهیاتگن اېدیمکی، واتساپیمگه بیر ویدیو کېلدی.
جۉنهتووچی رحیم اېدی.
اونینگ آرقهسیدهگی آسمان حلی هم قیزغیش اېدی؛ قویاش چیقیشیدن آلدینگی اۉشه قیسقه قیزیللیک تېز آرهده یۉقالیب کېتهدی. آرقه زمینهسیده ننگرهارنینگ یم-یشیل دلهلری و درختلری کۉرینیب تورردی، اوزاقدن اېسه قرغهلر نینگ آوازی اېشیتیلردی. او چرچهگندېک کۉرینردی، اما تبسم قیلردی؛ بو قووانچدن اېمس، بلکه حیاتی بیر نېچه ساعت ایچیده بونچهلیک اۉزگریب کېتگنیگه حلی هم ایشانالمهیاتگن آدم نینگ تبسمیگه اۉخشردی.
او دېدی: «کېچهسی جوده کېچ اېدی. تورخمگه یېتیب کېلدیم. اېندی اۉزیم نینگ ویدیوییمنی یوباردیم.»
رحیمنی مېن ییللر دوامیده تنيمن.
آتهسی اۉتّیز آلتی ییل اوّل قوندوزدن پاکستانگه کېلگن اېدی؛ یانیده محنت قیلیش قابلیتیدن باشقه هېچ قندهی سرمایهسی یۉق اېدی. او پېشاوردهگی نانوایخانهلردن بیریده شاگرد بۉلیب ایش باشلهدی. ییللر دوامیده خمیر قاردی، گاز تندورینی یاقدی و نان یاپدی. شو محنتی بیلن عایلهسینی آیاققه تورغیزدی.
رحیم عیناً شو شهرده دنیاگه کېلدی؛ تانگلری دایما ینگی نان هیدی انقیب تورهدیگن کۉچهلرده اولغهیدی. اونینگ بالهلیگی اون قاپلری، تیار خمیرلر و تندور نینگ ایسسیغی آرهسیده اۉتدی. محنت یاشیگه یېتگچ، آتهسی نینگ کسبینی دوام اېتتیردی. شاگردلیکدن باشلهدی و ییللر اۉتیب پېشاور نینگ حیات اباد بیرینچی فازسیده کیچیک بیر نانوایخانه آچیشگه موفق بۉلدی.
دوکانی کتّه اېمس اېدی: بورچکده گاز تندوری، ییللر دوامیده توتوندن قارهیگن دېوارلر، خمیر یاییش اوچون یاغاچ تخته و ینگی یاپیلگن نانلر تېریب قۉییلهدیگن تاکچه بار اېدی.
او اۉزبېک نانی یاپردی – دُمهلاق، قلین و کنجد سېپیلگن نان. اونینگ نانینی هم افغان، هم پاکستانلیک مزاجلر خرید قیلیشردی. اېرتهلبلری ینگی نان نینگ هیدی بیر نېچه دوکان نریسیگچه ترهلهردی. قویاش چیقمسیدن آلدین نانوایخانه آلدیده کیچیک نوبت پیدا بۉلردی. بعضی مزاجلر اونینگ اسمینی هم بیلیشمسدی؛ شونچهکه: «کۉچه باشیدهگی نانوایخانهدن نان آلیب کېل»، دېر اېدیلر.
رحیم ده پار «پیاوآر» کارتی بار اېدی. شو کارت آرقهلی بانک حساب رقمی آچگن، سیم-کارت آلگن، اوی و دوکان اجارهگه آلگن همده ایکّی اۉغلینی مکتبگه یوبارگن اېدی. ییللر دوامیده اونینگ حیاتی منه شو ترتیبده دوام اېتیب کېلگن اېدی.
کېین اېسه حیات استه-سېکین اۉزگره باشلهدی.
2025-ییل جون آییدن باشلب، او ییللر دوامیده فایدهلنیب کېلگن حجتلر اېندی اۉز کوچینی یۉقاتدی. بانک حساب رقمیدن فایدهلنه آلمهدی. سیم-کارتی اۉچیریلدی. کوندهلیک حیاتدهگی کۉپلب عادي ایشلر – اجاره شرطنامهسینی اوزهیتیریشدن تارتیب اداری ایشلرنی بجریشگچه – قیین یاکه عموماً امکانسیز بۉلیب قالدی.
اما تندور اۉچمهدی. او هر تانگ عادتدهگیدېک دوکانینی آچردی. تندورنی یاقر، خمیرنی تیارلر و بیرینچی مزاجنی کوتردی.
25-جولای تانگی هم خودّی شوندهی باشلندی. خمیر تیار اېدی. بیر نېچه نان تندورده پیشهیاتگن، بیر نېچته مزاج اېسه کوتیب تورگن اېدی. شو پیت بیر نېچه نفر پولیس خادیمی نانوایخانهگه کیریب کېلیشدی. رحیمنی اۉشه یېر نینگ اۉزیده، ایش اوستیده قۉلگه آلیشدی.
اونی نانوایخانهدن بیاموتریک رۉیخطگه آلیش مرکزیگه آلیب باریشدی. برماق ایزلرینی آلیش و معلوماتلرینی رۉیخطدن اۉتکزیش بیر نېچه ساعتدن آرتیق دوام اېتمهدی. شوندن سۉنگ، ایشی محکمه گه یوباریلمسدن و بیرار محکمه اونینگ تقدیری حقیده قرار چیقرمسدن، باشقه بیر گروه بیلن بیرگه تورخم چېگره گه آلیب کېتیلدی.
اۉشه کېچه نینگ اۉزیده او چېگرهدن اۉتدی. اېرتهسی کونی اېرتهلب، اۉشه ویدیونی یوبارگنیدن کېین ینه قۉنغیراق قیلدی. بو سفر او اۉزی حقیده کمراق گپیردی.
او سۉرهدی: «عملیات قندهی بۉلهدی؟»
بیر نېچه ثانیه جیم قالدی. سۉنگ پستراق آوازده دېدی:
«قنی اېدی، فقط اۉشه کونی اولر نینگ یانیده بۉلگنیمده…»
اونینگ تورموش اۉرتاغی پېشاورده قالگن. او حاملهدار و شفاکار 28-جولای کونی جراحلیک عملیاتی اوچون وقت بېلگیلهگن. اولر نینگ سکّیز و اۉن یاشلی ایکّی اۉغلی اېسه آنهسینینگ یانیده قالگن.
رحیم حاضر ننگرهارده. او یېرده نه اویی بار، نه ایشی و نه سویهنهدیگن بیرار یقینی. آتهسی اۉتّیز ییلدن آرتیق وقت آلدین افغانستاننی ترک اېتگن اېدی، رحیم نینگ اۉزی اېسه بو مملکتده هېچ قچان یشش امکانیگه اېگه بۉلمهگن. اېندی او نامینی یخشی بیلهدیگن، اما کۉچهلری اۉزی اوچون مطلقا بېگانه بۉلگن شهرده توریبدی.
او اۉزی حقیده کم گپیرهدی. کۉپراق تورموش اۉرتاغی حقیده سۉرهیدی: عملیات قندهی اۉتهدی، اۉشه کونی اونینگ یانیده کیم بۉلهدی و بالهلرگه کیم قرهیدی. او: «اولر حقیده اۉیلهمسلیک نینگ علاجی یۉق»، دېیدی.
بیر نېچه ساعتدن کېین او ینه قیسقه خبر یوباردی.
«قَیتیش نینگ بیر یۉلینی قیدیریهپمن.»
او قندهی قَیتیشینی یازمهدی. قَیسی یۉل بیلن قیتماقچی اېکنینی هم ایتمهدی. فقط شو بیر جمله.
اېرتهسی کونی مېن اونینگ نانوایخانهسی یانیدن اۉتدیم. تندور یانیب تورردی. پاکستانلیک ایشچی چوکی آرتیده خمیر یایر، نانلرنی تندورگه یاپیشتیرر و تېمیر سیخ بیلن آلیب چیقر اېدی. مزاجلر بیرن-کېیتن کېلیب، نان ساتیب آلیب کېتیشردی. ینگی نان نینگ هیدی عادتدهگیدېک بوتون کۉچهگه ترهلگن اېدی. اگر کیمدیر رحیمنی تنیمهگنیده، احتمال هېچ قندهی غیرعاددي حالتنی سېزمهگن بۉلردی. تندور هنوز یانیب تورردی. فقط رحیم نینگ اۉزی یۉق اېدی.
ایکّی کوندن کېین اونینگ تورموش اۉرتاغی رحیم سیز عملیات خانهگه کیریشی کېرهک.
اېسلتمه: اوشبو گزارشدهگی باش قهرمان نینگ اسمی اونینگ التماسیگه بناءً اۉزگرتیریلگن. گزارش جاییدهگی کوزهتوولر، رحیم بیلن بېواسطه صحبت، تېلفون آرقهلی ملاقات همده او یوبارگن ویدیوگه اساسلنیب تیارلندی.
