«سپاهیان میهن» اۉزینینگ «آیننامه مبارزاتینی» نشر قیلیب، اونده «دیني تعلیماتلر اساسیده اۉزینی جنوا تۉرت کانوانسیونی همده قوراللی ماجرالرگه عاید خلق ارا بیتیملر قاعدهلریگه رعایه اېتیشگه مجبور دېب بیلیشینی» معلوم قیلدی.
طالبلرگه قرشی ینگی قوراللی گروه بۉلگن اوشبو جبهه دستلب «سپاهیان میهن» نامی بیلن تنیلگن اېدی. او جاري ییل نینگ 26-سرطان کونی بدخشان ولایتی نینگ یفتل اولسواللیگی مرکزیگه هجوم اویوشتیریب، سۉنگگی بېش ییل ایچیده ایلک بار اوشبو اولسواللیک مرکزینی بیر نېچه ساعت دوامیده طالبلر نظارتیدن چیقرگن اېدی.
جبهه بوگون، سهشنبه، 6-اسد کونی اوچ باب و 20 مادّهدن عبارت «آین نامه مبارزاتی» متنینی نشر قیلیب، اونی «عمل میدانیدهگی خطی-حرکتلر اوچون ایشانچلی حجت و اساسي مېزان» صفتیده ایشلب چیققنینی بیلدیردی. بیاناتده ایتیلیشیچه، مذکور حجت انسان قدر-قیمتینی حرمت قیلیش، جماعتچیلیک وجدانی، دیني قدریتلر و خلقارا معیارلرگه رعایه اېتیشنی تأمینلش مقصدیده تیارلنگن.
سپاهیان میهن جبههسینینگ تأکیدلشیچه، نظامنامه جنگ میدانیدهگی مجبوريتلر، یرهدارلر و حربي اسیرلرگه مناسبت، اسلامي قدریتلر، انسان حقوقلری، عدالت و انسان شأنی همده قدر-قیمتینی حمایه قیلیش مسألهلرینی اۉز ایچیگه آلهدی.
مذکور نظامگه کۉره، جبهه تینچ اهالیگه هجوم قیلمسلیک، حربي تامانلر نینگ تینچ فقرالردن عبارت قرینداشلرینی نشانگه آلمهسلیک همده اولرگه نسبتاً باسیم، تهدید یاکه گروگه آلیش حالتلرینینگ آلدینی آلیش مجبوريتینی آلگن.
جبهه، شونینگدېک، حربي اسیرلرگه خلقارا کانوانسیونلر همده اسلامي و انساني قدریتلرگه موافق مناسبتده بۉلیشینی، هر قندهی قییناق، تهدید یاکه تحقیرلاوچی معاملهنی تعقیقلشینی و اسیرگه آلینگن یرهدارلرنی دوالشنی اوستوار وظیفه دېب بیلیشینی بیلدیرگن.
سپاهیان میهن جبههسی حربي اسیرلرنی اولر نینگ انساني حقوقلریگه رعایه قیلگن حالده المشیشینی، خلقارا تشکیلاتلرنینگ اسیرلر حالتینی کوزهتیشینی قۉللب-قوّتلشینی همده اولرگه عاید معلومات آلیش و اوچرهشوولر تشکیل اېتیش امکانینی یرهتیشینی معلوم قیلگن.
نظام نینگ 13-مادّهسیده شوندهی دېییلهدی: «اگر سپاهیان مهین جبههسی فایدهسیگه جاسوسلیک قیلگنی اثباتلنسه، ایشانچلی دلیللر تقدیم اېتیلگن حالده عیبلنووچی عامهوي، خلق اشتراکیدهگی، شفّاف محکمهده و یېتکرمه حضوریده محکمه قیلینهدی. جنایتی اثباتلنگن تقدیرده اېسه آغیر (اۉلیم جزاسیسیز) جزا تعیینلنهد»
نظامده جبهه شفاخانهلر، تعلیم مؤسسهلری، سوو و الکتر ترماقلری کبی جماعت آستقورمهلریگه هجوم قیلمسلیگی، افغانستان نینگ مادّي و ناماددي مدني میراثینی حرمت قیلیشی همده اولرنی بوزیش، تالان-تاراج قیلیش یاکه یۉق قیلیش نینگ آلدینی آلیشی قید اېتیلگن.
جبهه ینه شونی بیلدیرگنکی، «حربي تامانلر نینگ تینچ فقرالردن عبارت قرینداشلری (آته، آنه، اکه-اوکه، تورموش اۉرتاغی، بالهلر، قرینداشلر و جنگلرده قتنهشمهیدیگن کتّهلر) نشانگه آلینمهیدی همده اولرگه نسبتاً باسیم، تهدید یاکه گروگه آلیشگه یۉل قۉییلمهیدی»
شونینگدېک، نظامده جبهه اعضالری نینگ قاعدهبوزرلیکلری اوچون جوابگرلیک و اولرگه نسبتاً کۉریلهدیگن چارهلر هم بېلگیلنگن.
18-مادّهده شوندهی دېییلگن: “اگر جبهه اعضاسی نینگ مال-ملکنی ناقانوني اېگهللشی، شأن و قدر-قیمتنی تحقیرلشی، تاولمچیلیک، تهدید، زۉرلش، قییناق یاکه فقرالرنینگ انساني قدر-قیمتیگه قرشی باشقه هر قندهی حرکتی اثباتلنسه، او خلق اشتراکیدهگی، شفّاف و مستقل محکمه ده کۉریب چیقیلهدی همده جنگاور نظامنامه اساسیده جزالنهدی»
سپاهیان میهن جبههسی، شونینگدېک، «اۉزینی خلق و انسان حقوقلرینی نظارت قیلووچی محکمه آلدیده جوابگر دېب بیلیشینی» هم بیلدیرگن.
مذکور ینگی قوراللی گروه نامی 26-سرطان کونی بدخشان نینگ یفتل پایین تومنی مرکزیگه اویوشتیریلگن هجومدن سۉنگ عامهگه معلوم بۉلدی.
اۉشه هجوم دوامیده جبهه طالبلرنینگ تومن ایچکی ایشلر باشقرمهسی و استخبارات ادارهسینی بیر نېچه ساعت دوامیده اۉز نظارتیگه آلگن اېدی.
بو طالبلر افغانستانده ینه حاکمیتنی قۉلگه آلگنیدن بویان ایلک بار بیرار اولسواللیک، گرچه وقتینچه بۉلسه-ده، اولرنینگ نظارتیدن چیقیشی بۉلدی.
افغانستان سابق ملي اوردوسی نینگ کامندوسی قَیوم ملنگ سپاهیان میهن جبههسیگه قوماندانلیک قیلماقده.
