امریکا فدرال محکمهسی افغانستانلیک قاچقینلرنینگ عایله اعضالرینینگ مملکتگه کیریشینی چېکلاوچی سیاحت تعقیقینی «قانونگه خلاف» دېب تاپدی.
مذکور قرار چهارشنبه کونی (۷-اسد) ویرجینيا ایالتینینگ شرقي بۉلگهسی فدرال محکمهسی اسکندريه بۉلیمی محکمهسی آنتونی جی. ترنگا تامانیدن چیقریلدی.
محکمه مجلسی امریکادن باشپناه و دایمي یشش حقوقینی آلگن یېتّی نفر افغانستانلیک قاچقین نینگ دعواسی اساسیده اۉتکزیلدی. اولر جمهور رییس دونالد ترامپ نینگ ینگی فرمانی سببلی عایله اعضالرینی امریکاگه آلیب کېله آلمهیاتگنینی بیلدیرگن.
محکمه ترنگا قراریده شوندهی دېییلهدی: «تشقی ایشلر وزیرلگی نینگ جمهو رییس نینگ ۱۰۹۴۹ و ۱۰۹۹۸-سانلی فرمانلرینی عایلهنی بیرلشتیریش دستوری آرقهلی مراجعت قیلگن قاچقینلرگه تطبیق اېتیشی همده شو اساسده اولرگه سفر رخصتنامهسی بېریلیشینی تۉختهتیشی قانونگه ضد حسابلنهدی و اوشبو سیاست بېکار قیلینهدی.»
فدرال محکمه جمهور رییس فرمانلریده باشپناه آلگن شخصلر سیاحت چېکلاولریدن انیق روشده مستثنا اېتیلگنی، شو سببلی بو فرمانلر اولر نینگ عایله اعضالرینی قانوني روشده امریکاگه قۉشیلیش جریانیگه تۉسقینلیک قیلمسلیگی کېرهکلیگینی تأکیدلهدی.
محکمه قراریگه کۉره، امریکا حکومتی۱۵ کون ایچیده دعواگرلرنینگ بېش نفر عایله اعضاسیگه سفر حجتلرینی رسميلشتیریشی همده ینه ایکّی ایشنی سیاحت تعقیقی چېکلاولرینی قۉلهمسدن قَیته کۉریب چیقیشی شرط.
محکمه، شونینگدېک، تشقی ایشلر وزیرلیگی سیاستی اداری قانون-قاعدهلرگه ضد اېکنینی بیلدیریب، دعواگرلرنینگ عایله اعضالری امریکاگه کیریب کېلگونیگه قدَر اوشبو قرار اجراسی اوستیدن نظارت آلیب باریشینی معلوم قیلدی.
محکمه قراریده علیحده تأکیدلنیشیچه، بو حکم ترامپ مأموریتی نینگ عمومي سیاحت تعقیقینی بېکار قیلمهیدی. قرار فقط امریکاده باشپناه آلگن و عایله اعضالرینی بیرلشتیریش بۉییچه عریضهلری اوّلدن تصدیقلنگن شخصلر نینگ تورموش اۉرتاقلری و فرزندلریگه تعلقلی دیر.
اېسلهتیب اۉتمیز، دونهلد ترامپ ۲۰۲۵-ییل جون آییده چیقرگن فرمانی بیلن۱۲ دولت، جملهدن افغانستان وطنداشلرینینگ امریکاگه کیریشینی قطعي تعقیقلهگن اېدی. مذکور فرماندن سۉنگ امریکا اوردوسی و امریکا مؤسسهلری نینگ مینگلب سابق همکارلری همده اولرنینگ عایله اعضالرینی قطر، پاکستان و منطقه نینگ باشقه دولتلریدن امریکاگه کۉچیریش جریانی تۉختهب قالگن
