داعش-خراسان بدخشاندهگی طالبلرنینگ اخبارات و مدنیت ریاستی باشلیغی ذبیحالله امیری اۉلدیریلگنی اوچون جوابگرلیکنی اۉز ذمّهسیگه آلدی.
فرانسه خبریگه کۉره، اېکسترېمیستیک گروهلر فعالیتینی کوزهتووچی «سایت» (SITE ) مرکزی داعش-خراسان چهارشنبه کونی نشر قیلگن بیاناتیده اوشبو گروه اعضالری سهشنبه کونی بدخشان مرکزی فیض آباد شهری یۉلیده ذبیحالله امیریگه هجوم اویوشتیریب، اونی و قۉریقچیلریدن بیرینی اۉلدیرگنینی معلوم قیلگن.
طالبلر رسميلری سهشنبه کونی امیرینینگ اۉلدیریلگنینی تصدیقلب، هجومچیلردن بیری اۉلدیریلگنی، ایکّینچیسی اېسه قۉلگه آلینگنینی بیلدیرگن. طالبلرنینگ بدخشان ولایتی امنیه قوماندانلیگی مطبوعات سۉزلاوچیسی معلوماتیگه کۉره، ایکّی نفر موترسیکلچی فیض آباد-بهارک یۉلیده ذبیحالله امیریگه هجوم قیلگن.
زبیحالله امیری طالبلرنینگ هلمند ولایتی والیسی امان الدین منصورنینگ جیینی اېدی.
بو هجوملر طالبلر افغانستانده تۉلیق خوفسیزلیک تأمینلنگنینی دعوا قیلهیاتگن بیر پیتده دوام اېتماقده.
داعش-خراسان جاري ییل جنوری آییده کابلدهگی چین رستورانتیده صادر اېتیلگن پارتلش اوچون هم جوابگرلیکنی اۉز ذمّهسیگه آلگن اېدی. اۉشه هجوم عاقبتیده کمیده یېتّی کیشی هلاک بۉلگن.
شونینگدېک، گروه ۲۰۲۴ییل دسامبر آییده کابلده صادر اېتیلگن خودکوشلیک هجومی اوچون هم جوابگرلیکنی تن آلگن. اۉشه هجومده طالبلرنینگ قاچقینلر ایشلری وزیری خلیل الرحمن حقّاني هلاک بۉلگن.
شو پیتگچه داعش جوابگرلیکنی اۉز ذمّهسیگه آلگن هجوملرده طالبلرنینگ بیر قطار یوقاری مرتبهلی عملدارلری، جملهدن بلخ ولایتی حاکمی و بدخشان امنیه قوماندانی هم هلاک بۉلگن.
