طالبلرنینگ ننگرهار ولایتی اخبارات و مدنیت ریاستی اطلاعات بۉلیمی باشلیغی قریشي بدلوننینگ معلوم قیلیشیچه، اوشبو ولایت شینوار اولسواللیگیده اوی تامی نینگ قولهشی عاقبتیده بیر کیشی هلاک بۉلگن، ینه اوچ کیشی جراحتلنگن.
اونینگ ایتیشیچه، حادثه پنجشنبه کونی (۸ اسد) کېچهسی شینوار اولسواللیگینینگ «۲۵ ویالی» منطقهسیده یوز بېرگن.
بدلوننینگ سۉزلریگه کۉره، کوچلی یاغینگرچیلیک سبب اوی تامی قولهگن. عاقبتده بیر کیشی هلاک بۉلگن، بیر باله و ایکّی عیالنی اۉز ایچیگه آلگن اوچ کیشی تن جراحتی آلگن.
شونینگدېک، او اۉتگن کېچهدهگی کوچلی یامغیر و سوو تاشقینلری نتیجهسیده جلال آباد شهری نینگ 8-ناحیهسی دامان حدودی همده مومندره تومنی نینگ «هزارناو» حدودیده۹۰ ته لایدن قوریلگن اوی تۉلیق یاکه قسماً ویران بۉلگنینی معلوم قیلدی.
ننگرهارده کوچلی یامغیر و سېل عاقبتیده ینه قربانلر و مادّي ضرر قید اېتیلماقده. تخمیناً اۉن کون اوّل هم مملکت شرقیده یوز بېرگن ویرانکار سېل عاقبتیده اۉنلب آدملر هلاک بۉلگن، ینه کۉپلب کیشیلر جراحت آلگن اېدی.
دوشنبه کونی (۲۹سرطان) نورستان ولایتی مرکزی پارون شهریده یوز بېرگن کوچلی یامغیر و ییریک سېل عاقبتیده کمیده ۲۳ کیشی هلاک بۉلگن، ۸۰ گه یقین کیشی جراحتلنگن.
شونینگدیک بیرلشگن ملتلر تشکیلاتینینگ یاردملرینی هماهنگ قیلووچی اداره (اوچا)نینگ معلوم قیلیشیچه، ننگرهار ولایتیدهگی تورخم چېگره اۉتیش یۉلیده هم سېل کوزهتیلگن. اوشبو حادثهده پاکستاندن قَیتگن ۳ نفر مهاجر هلاک بۉلگن، ینه ۹کیشی جراحت آلگن.
