طالبلرنینگ ساغلیقنی سقلش وزیرلیگی افغانستان ساغلیقنی سقلش تیزیمینی مستحکملش، اصلاح قیلیش و رواجلنتیریشگه قرهتیلگن 2026–2030-ییللرگه مۉلجللنگن افغانستان ملي ساغلیقنی سقلش استراتیژيسینی تقدیم اېتدی.
جهان ساغلیقنی سقلش تشکیلاتی و ساغلیقنی سقلش ساحهسیدهگی همکارلر تخنیکي کۉمهگیده ایشلب چیقیلگن اوشبو استراتیژي بوگون (سهشنبه، ۱۳-اسد) کابلده اۉتکزیلگن مراسمده تنیشتیریلدی.
طالبان نینگ ساغلیقنی سقلش وزیری نور جلال جلالي استراتیژي ساغلیقنی سقلش خدمتلرینی اصلاح قیلیش و رواجلنتیریش یۉلیدهگی مهم قدم اېکنینی ایتیب، اونینگ عملگه آشیریلیشی نتیجهسیده طبي خدمتلردن فایدهلنیش امکانیتی کېنگهییشی، خدمتلر صفتی یخشیلنیشی، ساغلیقنی سقلش تیزیمی نینگ اینفرهتوزیلمسی همده کادرلر صلاحیتی مستحکملنیشینی تأکیدلهدی.
اونینگ سۉزلریگه کۉره، استراتیژي اهالی ساغلیقنی سقلش احتیاجلرینی یخشیراق قاندیریش و صفتلی طبي خدمتلردن ینه-ده عدالتلی همده کېنگ فایدهلنیش امکانینی یرهتهدی.
جهان ساغلیقنی سقلش تشکلاتی نینگ افغانستاندهگی وکیلی ادوین سنیزا سالوادور مراسمده سۉزگه چیقیب، شوندهی دېدی: «استراتیژي نینگ حقیقي قیمتی آدملر اونینگ نتیجهسینی کوندهلیک حیاتیده حس قیلگنیده نمایان بۉلهدی. یعنی، آنه خوفسیز طبي خدمتگه اېریشه آلگنیده، باله اۉز وقتیده دوالنگنیده، ضرور دارو-درمانلر موجود بۉلگنیده و طبیات خادملری یېترلی قۉللب-قوّتلاوگه اېگه بۉلگنیده.»
اونینگ تأکیدلشیچه، مذکور استراتیژي ساغلیقنی سقلش تیزیمی بۉیلب صفت، تېنگلیک و حسابدارلیکنی آشیریش اوچون انیق یۉل خریطهسینی بېلگیلهیدی. جسست ملي ساغلیقنی سقلش ادارهلری، همکارلر و محلي همجمعيتلر بیلن بیرگهلیکده استراتیژيدهگی اوستوار یۉنهلیشلرنی عملي نتیجهلرگه ایلنتیریش همده ضرور طبي خدمتلرنی برقرار مالیهلشتیریشنی قۉللب-قوّتلشنی دوام اېتتیرهدی.
جهان ساغلیقنی سقلش تشکیلاتی معلوماتیگه کۉره، استراتیژي ساغلیقنی سقلش ساحهسیدهگی منبعلردن ثمرهلیراق فایدهلنیشنی نظرده توتهدی و ساغلیقنی سقلش تیزیمینی مستحکملش، یوقاری تأثیرگه اېگه چارهلرنی عملگه آشیریش، طبي خدمتلردن فایدهلنیش امکانیتینی یخشیلش همده ساغلیققه تأثیر قیلووچی تورلی ساحهلر اۉرتهسیدهگی همکارلیکنی کوچهیتیریشگه علیحده اعتبار قرهتهدی.
تشکیلات نینگ تأکیدلشیچه، اوشبو استراتیژي ساغلیقنی سقلش تیزیمینی توبدن اصلاح قیلیش بۉییچه انیق تصورنی بېلگیلب، افغانستاندهگی برچه عیاللر، اېرککلر و بالهلر نینگ عدالتلی، صفتلی و برقرار طبي خدمتلردن فایدهلنیشینی تأمینلش یۉلیده مهم قدم حسابلنهدی.
طالبان ساغلیقنی سقلش وزیرلیگی و جسست معلوماتلریگه کۉره، استراتیژي یېتّیته اوستوار یۉنهلیشنی اۉز ایچیگه آلهدی: باشقروو و یېتکچیلیکنی کوچهیتیریش، طبیات کادرلرینی رواجلنتیریش، برقرار مالیهلشتیریش، خدمتلر کۉرسهتیشنی یخشیلش، خوفسیز دارو واسطهلری و طبي تکنالوژيلرگه کیریشنی کېنگهیتیریش، ساغلیقنی سقلش اخبارات تیزیملرینی مستحکملش همده ثمرهلی همکارلیکنی رواجلنتیریش.
جهان ساغلیقنی سقلش تشکیلاتی نینگ قید اېتیشیچه، اوشبو اوستوار یۉنهلیشلر نینگ برچهسی طبي خدمتلر صفتینی آشیریش، اولرنی اهالی نینگ احتیاجلریگه ماسلشتیریش و فوق العاده وضعیتلرده هم اساسي طبي خدمتلرنی اوزلوکسیز کۉرسهتیش امکانیتینی مستحکملشگه قرهتیلگن.
شونینگدېک، استراتیژيده ساغلیقنی سقلش فقط طبي خدمتلر بیلن چېکلنمسلیگی، بلکه طعاملنیش، تعلیم، خوفسیز ایچیملیک سووی، تورموش درجهسی و اجتماعي حمایه کبی عامللرگه هم باغلیق اېکنی تأکیدلنگن.
جهان ساغلیقنی سقلش تشکیلاتی استراتیژينی موفقیتلی عملگه آشیریش اوچون تورلی ساحهلر اۉرتهسیدهگی موافقلشتیریلگن همکارلیک، محلي همجعیتلر، ساغلیقنی سقلش همکارلری و دونرلر نینگ دایمي اشتراکی ضرورلیگینی قید اېتدی.
مذکور استراتیژي افغانستان ساغلیقنی سقلش تیزیمی جدّي مالیوي چېکلاولر و اوزلوکسیز انقراضلر بیلن یوزمه-یوز تورگن، شونینگدېک، مملکت نینگ 12 ولایتیده بالهلر اۉرتهسیدهگی تۉییب طعاملنمسلیک درجهسی بحرانی باسقیچگه یېتگن بیر پیتده تقدیم اېتیلدی.
باشقه تاماندن، طالبلر تامانیدن عیاللر نینگ اېرکین حرکتلنیشیگه قۉییلگن چېکلاولر و اَیریم ولایتلرده اېرکک محرمسیز عیاللرنی دوالش تعقیقلنگنی سببلی عیاللر همده قیزلر نینگ طبي خدمتلردن فایدهلنیشی ینهده قیینلشیب، مملکتدهگی ساغلیقنی سقلش بحرانی چوقورلشماقده.
