منبعلر باميان ولایتیده طالبلرنینگ عدلیه وزیری عبدالحکیم شرعي تۉرت نفر هزاره خادیمیدن تشقری، ولایت عدلیه ریاستینینگ باشقه خادملرینی هم حبسگه آلیب، اۉزینینگ شخصي قماقخانهسیگه جایلشتیرگنینی اَیتماقده.
منبعلرگه کۉره، فقط باشلیق، اداری بۉلیم باشلیغی و بیر نفر یاللنمه خادم حبسگه آلینمهگن. ریاستدهگی باشقه خادملر اېسه شو هفته نینگ شنبه کونیدن (۳۱اسد) بېری طالبلر عدلیه وزیرینینگ قۉلیده حبسده سقلنماقده.
شو بیلن بیرگه، بیر منبع باميان عدلیه باشقرمهسیده۲۱ نفر، باشقه بیر منبع اېسه۱۴ نفر خادم ایشلشینی ایتگن.
منبعلر بېرگن معلوماتلرگه کۉره، بو خادملر بامياندهگی طالبان عدلیه باشقرمهسی اداری بۉلیمی باشلیغی بیلن کېلیشماوچیلیک آرتیدن جماعهوي روشده استعفا بېرگن. شوندن سۉنگ طالبلر عدلیه وزیری اولرنی کابلگه چقیرتیرگن، برچهسینی لوازمیدن آزاد قیلگن و کېینچهلیک اۉزینینگ شخصي قماقخانهسیگه جایلشتیرگن.
منبعلر اوّلراق «اطلاعات روز» گزیتهسیگه اوشبو باشقرمهنینگ تۉرت کیشی هزاره خادیمی طالبان عدلیه وزیری تامانیدن حبسگه آلینگنی و قماققه تشلنگنی حقیده خبر بېرگن اېدی.
منبعلر معلوماتیگه کۉره، طالبلرنینگ بامياندهگی عدلیه ریاستی عیناً شو تۉرت کیشی هزاره خادم ایشلهگن، حبسگه آلینگن باشقه خادملر اېسه باشقه اېتنیک گروهلرگه منسوب.
منبعلر وزیر خادملرنینگ جماعهوي استعفاسینی «بۉیسونمسلیک» و اطاعت قیلمسلیکنینگ بیر توری صفتیده بهالهگنینی ایتگن.
طالبلر عدلیه وزیرلیگی و اوشبو گروهنینگ بامياندهگی عدلیه باشقرمهسی حاضرگچه خادملرنینگ حبسگه آلینیشی یوزهسیدن ایضاح بېرمهگن.
طالبلر عدلیه وزیری سۉنگگی ییللرده بیر نېچه بار شخصي قماقخانهگه اېگه بۉلیش، آدملرنی، خصوصاً، شیعه و هزارهلرنی اۉزباشیمچهلیک بیلن حبسگه آلیش و قماققه تشلشده عیبلنگن.
او جاري ییل محرّم آییده کابل شهرینینگ اَیریم حدودلریده ماتم بیراقلری اۉرنهتیلگنی سببلی بیر گروه شیعه و هزاره آقسقاللرینی حبسگه آلیب، وقتینچه قماقده سقلهگن اېدی.
طالبلر عدلیه وزیری، شونینگدېک، شیعهلر و هزارهلرگه نسبتاً کمسیتووچی مناسبتده بۉلیشده عیبلنگن. جاري ییل اسد آییده بیر گروه شیعه علمالری و آقسقاللری بیانات اعلان قیلیب، بوندهی مناسبتنی «طاقت قیلیب بۉلمهیدیگن» حالت دېب بهالهگن.
