نیپال و چیننینگ تبت حدودی چېگرهسیده هیمالیا تاغلریدهگی موزلیکلردن اولکن موز و تاش مسّهسی دریاگه قولهب توشیشی آرتیدن یوزهگه کېلگن تۉستدن صادر بۉلگن سېل عاقبتیده۱۶۵ کیشی هلاک بۉلگن، قریب۱ مینگ۴۰۰کیشی اېسه بېدرَک یۉقالگن.
نیپال و چین رسميلری بوگون (پنجشنبه، ۵-سنبله) تقدیم اېتگن سۉنگگی معلوماتلرگه کۉره، بېدرَک یۉقالگنلر آرهسیده ۷۶۰ نفر خارجلیک، اولر نینگ اکثریتی سیاحلردیر.
سېل ایکّی کون اوّل نیپال و چین نینگ تبت حدودی اۉرتهسیدهگی تاغلی منطقهده یوز بېرگن. نیپالنینگ راسوا و چین تبت نینگ گیرونگ حدودلری اېنگ کۉپ انساني تلفات و مادّي ضرر کۉرگن.
نیپال پولیسی مطبوعات سۉزلاوچیسی ابی نارایان کافله رویترز آژانسیگه ایتیشیچه، حاضرگچه کمیده ۱۶۲کیشی نینگ هلاک بۉلگنی و۷۲۶ کیشی نینگ بېدرَک یۉقالگنی تصدیقلنگن.
اونینگ قۉشیمچه قیلیشیچه، بېدرَک یۉقالگنلر آرهسیده قریب ۵۰۰نفر خارجلیک بار. اونینگ ایتیشیچه، ۱۷۷ نفر هندستان،۶۳نفر امیرکا،۳۴ نفر آسترلیا۳۳ نفر بویوک بریتانیا و ۲۵نفر کانادا وطنداشی بېدرَک یۉقالگن.
عینِ پیتده چین نینگ تبت منطقهسیده هم قربانلر سانی آرتیب بارماقده. تبت نینگ گیرونگ حدودیدهگی پولیس رسميلری بوگون اېرتهلبگچه اوچ کیشی نینگ هلاک بۉلگنی تصدیقلنگنینی، ۲۶۰ نفر خارجلیکنی اۉز ایچیگه آلگن۵۵۸ کیشی بېدرَک یۉقالگنینی معلوم قیلگن.
نیپال پولیسی مطبوعات سۉزلاوچیسی ابی نارایان کافله نینگ ایتیشیچه، قیدیروو ایشلری دوام اېتهیاتگنی و ینه کۉپلب جسدلر تاپیلیشی کوتیلهیاتگنی سببلی بو رقملر آشیشی ممکن.
نیپالده 5 مینگدن آرتیق اوردو و پولیس خادیمی قیدیروو-قوتقروو ایشلریده قتنشماقده. قوتقرووچیلر بوگون سېل باسگن حدودلرده قالیب کېتگن ۱۲۵کیشینی، جملهدن،۲۰ نفر خارجلیکنی قوتقریب آلگن.
تیک اوچرلر هم ضرر کۉرگن حدودلرگه چادرلر، آزیق-طعام و باشقه ضرور یاردم واسطهلرینی یېتکزماقده.
نیپال باش وزیری بالندرا شاه وضعیتنی اۉرگنیش اوچون نواکوت بیدور حدودیگه بارگن.
امریکا جیولوژی خدمتی تېکشیرووی شونی کۉرسهتگنکی، حادثه نینگ احتمالي سببی دېب تخمین قیلینگن۴.۴ رشترلی زلزله اصلیده موزلیکدهگی موز و تاشلر نینگ قولهشیدن یوزهگه کېلگن انرژی بۉلگن. اوشبو قولهش نتیجهسیده لیهوند دریاسیده اولکن سوو و چیقیندی آقیمی پیدا بۉلگن.
اوشبو حادثهده خارجلیک بېدرَک یۉقالگنلر سانی نینگ یوقاری بۉلیشیگه سببلر نینگ بیری کۉپلب قربانلر تبتدهگی «کایلاش ماناساروار» زیارتگاهیگه بارهیاتگن سیاحلر بۉلگنیدیر.
هیمالیا توریزم کمپنیلریدن بیری نینگ اجراچی مدیری ساگر پاندی رویترز خبرگزارلیگیگه ۱۵نفر هند-آسترلیالیک بېدرَک یۉقالگنلر آرهسیده اېکنینی ایتگن.
او حدودنی تیک اوچر ایچیدن کۉرگچ: «انسان یشهگنیدن هېچ قندهی ایز قالمهگن، همه نرسه تېکیسلنیب کېتگن»، دېیه تعریفلهگن.
اقش ۵۰۰ مینگ دالر مقداریده فوق العاده یاردم اجرهتیشینی معلوم قیلگن. بیرلشگن ملتلر تشکیلاتی هم جبرلنگن جماعهلرگه یاردم بېریش اوچون جهازلر و خادملر یوباریلیشینی بیلدیرگن. هندستان و باشقه دولتلر هم قوتقروو ایشلریده اشتراک اېتماقده.
