پاکستان تشقی ایشلر وزیرلیگی سۉزلاوچیسی طاهر اندرابينینگ ایتیشیچه، طالبلر بیلن هر قندهی ایکّی تامانلهمه میکانیزم اوشبو گروهنینگ شونچهکه «ایشانتیریشلری»گه اېمس، بلکه «انیق و عملي چارهلر» کۉریشیگه باغلیق بۉلهدی.
اکسپرس تریبون خبریگه کۉره، اندرابی اوشبو بیاناتنی بوگون (پنجشنبه، ۵-سنبله) مطبوعات انجمنیده طالبلرنینگ ایکّی تامان اۉرتهسیدهگی کېلیشماوچیلیکلرنی حل قیلیش اوچون مخصوص ایکّی تامانلهمه میکانیزم یرهتیش تکلیفی حقیدهگی سوالگه جوابن بیلدیرگن.
اونینگ ایتیشیچه: «هر قندهی مذاکرهلرنی باشلش اوچون افغانستان طالبلری اوشبو مملکت توپراغیدن پاکستانگه قرشی ترورچیلیک حرکتلرینی عملگه آشیریش اوچون فایدهلنیلمسلیگیگه کفالت بېریشی کېرهک.»
او، شونینگدېک، طالبلر خلقارا مجبوريتلرینی، جملهدن، دوحه کېلیشوویده بېلگیلنگن مجبوريتلرینی بجریشی و مخالف قوراللی گروهلر، خصوصاً، پاکستان طالبانی (تی تی پی) همده بلوچستان آزادلیک اوردوسی نینگ افغانستان توپراغیدن پاکستانگه قرشی فایدهلنیشیگه یۉل قۉیمسلیگی کېرهکلیگینی تأکیدلهدی.
اندرابی: «بیز نهادیلشگن موافقلشتیریشگه تیارمیز، بیراق بو موافقلشتیریش تروریزمگه قرشی کورهش و چېگرهلرنی ثمرهلی باشقریش ساحهسیده انیق همده تېکشیریلیشی ممکن بۉلگن چارهلر کۉریلیشیگه آلیب کېلیشی شرط»، دېدی.
پاکستاننینگ تأکیدلشیچه، تی تی پی کبی پاکستانلیک قوراللی گروهلر افغانستانده جایلشگن و اوشبو مملکت توپراغیدن پاکستانگه قرشی فایدهلنماقده. طالبلر اېسه بو گروهلرنینگ افغانستانده موجودلیگینی رد اېتهدی.
پاکستانلیک ترورچی گروهلرنینگ افغانستاندهگی فعالیتی طالبلر و پاکستان حکومتی اۉرتهسیدهگی مناسبتلرده کېسکینلیکنی کوچهیتیرگن و بو کېسکینلیک اۉتگن ییلی قوراللی تۉقنهشوولرگه آلیب کېلگن. عینِ پیتده پاکستان و افغانستان اۉرتهسیدهگی چېگرهلر تجارت و قتناو اوچون یاپیق.
