«افغانستان ملي مقاومت جبههسی» رهبری احمد مسعود باشچیلیگیدهگی مذکور جبهه بیاناتیده طالبلر «مقاومتنینگ معنوي سرمایهسی و اخلاقي آبروسیگه پوتور یېتکزیش» اوچون روانی اوروش آلیب بارهیاتگنینی ایتدی.
جبههنینگ بوگون (پنجشنبه، ۵-سنبله) نشر قیلینگن بیاناتیده ایتیلیشیچه، «طالبلر عیاللرنینگ پاک نامیدن فایدهلنیش، سایبری قۉشینلر و رقملی باتلرنی ایشگه سالیش همده متعصب دایرهلر بیلن تیل بیریکتیریش آرقهلی مقاومتنینگ معنوي سرمایهسی و اخلاقي آبروسیگه پوتور یېتکزیشگه اورینماقده».
«افغانستان ملی مقاومت جبههسی» نینگ تأکیدلشیچه، «اوشبو کۉپ قتلملی استخبارات لایحهسی دولت خزینهسینی تالان-تاراج قیلیش و خارجي یاردمدن سوءاستعمال قیلیش حسابیگه میلیونلب دالر مبلغ بیلن مالیهلشتیریلماقده».
جبهه طالبلر سۉنگگی بېش ییل دوامیده مقاومتنی انکار اېتیش و باستیریشده «موفقیتسیزلیککه اوچرهگنی»نی ایتیب، «اېندی ملی مقاومتنی باستیریشده حربي باشی بېرک کۉچهگه کیریب قالگنی، خلق تامانیدن مشروعیتگه اېگه اېمسلیگی و خلقارا مقیاسده یکّهلنیب قالگنینی انگلهگن حالده ینگی سناریوگه اۉتگن همده ایچکی و خلق ارا حاميلری کۉمهگیده کېنگ کۉلملی روانی اوروش باشلهگن».
«افغانستان ملي مقاومت جبههسی» مملکت خلقینی «تۉلیق هوشیارلیک بیلن دشمن نینگ استخباراتی حیلهلرینی برطرف اېتیشگه و جماعت همده مجازی مکانلرنینگ طالبلرنینگ روانی اوروش مقصدلرینی عملگه آشیریش واسطهسیگه ایلنیشیگه یۉل قۉیمسلیککه» چقیرگن.
مذکور بیانات جبهه قوماندانلریدن بیری حسیب پنجشېري اۉلدیریلگنیدن بیر هفته اۉتیب اعلان قیلیندی. پنجشېري اۉتگن هفته ینه ایکّی نفر «مقاومت جبههسی» اعضاسی بیلن بیرگه سالنگده اۉلدیریلگن. جبهه حاضرگچه حسیب پنجشېري و اونینگ همراهلرینینگ قندهی اۉلدیریلگنی حقیده ایضاح بېرمهگن.
طالبلرگه علاقهدار یېتکرمهلر حسیب پنجشېري یقینده پاکستاندن افغانستانگه کیریب کېلگنی و سالنگده پیستیرمهده اۉلدیریلگنینی دعوا قیلماقده.
پنجشېرينینگ اۉلدیریلیشی کېنگ کۉلملی مناسبت و همدردلیکلرگه سبب بۉلدی. طالبلرگه قرشی سیاسي آقیملر اونینگ وفاتی مناسبتی بیلن تعزیه بیلدیرگن. بیراق طالبلرگه علاقهدار یېتکرمهلر افغانستان نینگ اوّلگی حکومت دوریده حسیب پنجشېريگه قۉییلگن عیبلاولرنی قَیته تیلگه آلیب، اونی «اۉغری» دېب تعریفلهماقده. طالبلر، شونینگدېک، حسیب پنجشېري اۉلدیریلگنیدن کېین اونگه همدردلیک بیلدیرگن اَیریم کیشیلرنی هم حبسگه آلگن.
