نیپالنینگ چین بیلن چېگرهداش منطقهلریده کوچلی سوو تاشقینلری عاقبتیده جان بېرگنلر سانی۳۵۹ نفرگه یېتدی، مینگدن آرتیق کیشی اېسه بېدرَک یۉقالگن.
رویترز خبریگه کۉره، نیپال رسميلری ضرر کۉرگن حدودلرنینگ شهرلری و واديلریده قالیب کېتگن مینگلب آدملرنی قیدیریش همده اولرگه شاشیلینچ یاردم یېتکزیش اوچون تیک اوچرلردن فایدهلنماقده.
محلي یېتکرمهلر هلاک بۉلگنلر سانی۳۵۹ نفرگه یېتگنینی خبر قیلگن. اۉنلب جسدلر هم سوو تاشقینی عاقبتیده پستتېکیسلیک حدودلرگه آقیب کېلگن و اولرنی آلیب چیقیش همده شخصینی انیقلش ایشلری دوام اېتماقده.
نیپال ایچکی ایشلر وزیری سودان گورونگنینگ ایتیشیچه، قوتقروو ایشلریده اساسي اعتبار همان تیریک قالگنلرنی تاپیشگه قرهتیلگن.
اېنگ کۉپ ضرر کۉرگن تریشولی منطقهسیده قوتقروو گروهلری اوّل بېدرَک یۉقالگن۱۰۰ نفر هندستان وطنداشی، اساسن زیارتچیلر، شونینگدېک،۲۵ کیشی چینلیک ایشچینی تاپگن.
حاضرچه 650 نفردن آرتیق خارجلیک بېدرَک یۉقالگن بۉلیب، نیپال رسميلری مملکت یشاوچیلری آرهسیده قنچه کیشی بېدرَک یۉقالگنینی حلی انیقلهی آلمهگن.
قیزیل خاچ تشکیلاتی اوشبو حادثه عاقبتیده قیشلاقلر ویران بۉلگنینی معلوم قیلگن. یۉللرنینگ یاپیلیشی و کۉپریکلرنینگ ویران بۉلیشی کۉپلب جماعهلرنی یاردمدن اوزیب قۉیگن.
تشکیلاتنینگ قۉشیمچه قیلیشیچه، اوشبو فلاکتنینگ تۉلیق کۉلمی حلی انیقلنمهگن.
چین دولت تلویزیونی پنجشنبه کونی تبت حدودیدهگی جیرونگ تومنیده بېدرَک یۉقالگنلر سانی۵۵۸ نفرگه یېتگنینی معلوم قیلدی. اولر نینگ۲۶۰نفری خارجي فقرالردیر. چین معلوماتلریگه کۉره، مملکتده هلاک بۉلگنلر سانی همان اوچ نفرنی تشکیل اېتماقده.
شو بیلن بیرگه، نیپال فوق العاده وضعیتلرنی باشقریش ادارهسی چهارشنبه کونی یوز بېرگن سوو تاشقینی جاییده دریا یۉلینینگ تۉسیلیب قالیشی نتیجهسیده حاصل بۉلگن کۉلدهگی سوو سطحی آشیب بارهیاتگنیدن آگاهلنتیردی. طبيعي تۉغاننینگ بوزیلیب کېتیش خوفی موجود.
