بغلان ولایتیدهگی محلي منبعلر طالبلر اوشبو ولایتنینگ خوست اولسواللیگیده ایکّی یاش ییگیتنی «آتیب اۉلدیرگنی» و اولرنینگ جسدلرینی عامهگه نمایش قیلگنینی اَیتماقده.
منبعلرگه کۉره، بو ایکّی ییگیت بوگون اېرتهلب (جمعه، ۶سنبله) بغلاننینگ خوست اولسواللیگی فرغانبل و تخارنینگ ورسج اولسواللیگی اۉرتهسیدهگی تاغلردن قۉلگه آلینگن و آتیب اۉلدیریلگن.
منبعلر معلوماتیگه کۉره، بو ایکّی ییگیت نینگ اسمی امرالله و نورا بۉلگن. طالبلر دستلب اولرنینگ جسدلرینی فرغنبال قیشلاغی بازاریده، کېین اېسه بغلاننینگ خوست اولسواللیگی مرکزیدهگی دوابی بازاریده نمایش قیلگن.
منبعلر دعوا قیلیشیچه، طالبلر کوچلری بو شخصلرنینگ جسدلریگه تیزاب هم سېپگن و حاضرگچه جسدلرنی قویاش آستیدن آلیب، باشقه جایگه کۉچیریشگه رخصت بېرمهگن.
منبعلر خبریگه کۉره، بو ایکّی کیشی طالبلر تامانیدن قۉلگه آلینگن پیتده یانیده بیر دانه «ساچمه اۉق» مِیلتیغی بۉلگن. اولر کانلرده ایشچی بۉلیب ایشلش اوچون تخارنینگ ورسج اولسواللیگی آرقهلی بدخشانگه باریشنی رېجهلشتیرگن.
منبعلرنینگ دعوا قیلیشیچه، بو ایکّی یاشنینگ طالبلرگه قرشی جنگ قیلهیاتگن جبههلر بیلن هېچ قندهی علاقهسی بۉلمهگن. اولر یۉلنینگ تاغلی و خوفلی اېکنی سببلی ساچمه اۉق مِیلتیغینی آلیب یورگن.
شو بیلن بیرگه، طالبلر نظارتیدهگی یېتکرمهلر اوشبو گروهنینگ بغلان ولایتیدهگی حاکم ادارهسیگه تهیهنیب خبر بېریشیچه، «افغانستان ملي مقاومت جبههسی» نینگ ایکّی اعضاسی خوست تومنینینگ فرغنبال قیشلاغیده، ینه ایکّی کیشی اېسه اوشبو ولایتنینگ نهرین تومنیده اۉلدیریلگن.
«افغانستان ملي مقاومت جبههسی» حاضرچه بو بارهده ایضاح بېرمهگن.
