«افغانستان آزادلیک جبههسی» بدخشان ولایتینینگ زیباک اولسواللیگیده اۉز کوچلری و طالبلر اۉرتهسیده ینگی تۉقنهشوو یوز بېرگنینی معلوم قیلدی.
اوشبو جبهه بیاناتیده ایتیلیشیچه، تۉقنهشوو کېچه کېچقورون باشلنگن و بوگون تانگگچه (جمعه، ۶-سنبله) دوام اېتگن. نتیجهده «طالبلرنینگ ینگی و قۉشیمچه کوچلری» «چېکینیشگه» مجبور بۉلگن.
«افغانستان آزادلیک جبههسی» نینگ قۉشیمچه قیلیشیچه، «طالبلر بدخشاندهگی محلي باشقروودهگی اۉزگریشلر بیلن بیر وقتده زیباکدهگی جنگگه کابلدن ینگی یاردمچی کوچلرنی یوبارگن».
طالبلر رهبری هبتالله آخوندزاده یقینده فرمان چیقریب، بدخشاندهگی اوشبو گروهنینگ ولایت حاکمی و پولیس باشلیغینی المشتیرگن.
«افغانستان آزادلیک جبههسی» بیاناتیده کېچهگی تۉقنهشووده طالبلر کوچلری «کتّه تلفات» کۉرگنی، هلاک بۉلگنلر و یرهدارلر زیباک همده بهارک اولسواللیگیدهگی دوالش مرکزلری و فیض آباد شهریدهگی شفاخانهگه آلیب کېتیلگنی ایتیلگن.
بیراق جبهه طالبلرنینگ انیق قنچه تلفات کۉرگنینی معلوم قیلمهگن.
بدخشاندهگی طالبلرنینگ محلي مسووللری حاضرچه اوشبو تۉقنهشوو یوزهسیدن ایضاح بېرمهگن.
«افغانستان آزادلیک جبههسی» قریب بیر آیدن بېری بدخشاننینگ زیباک اولسواللیگیده طالبلر بیلن وقتی-وقتی بیلن تۉقنهشوولر بۉلهیاتگنی حقیده خبر بېرماقده.
طالبلر اوشبو جبهه بیلن زیباکدهگی دستلبکی تۉقنهشوونی تصدیقلهگن، بیراق تومندهگی کېینگی تۉقنهشوولر یوزهسیدن حاضرگچه ایضاح بېرمهگن.
