طالبلر مطبوعات سۉزلاوچیسی ذبیحالله مجاهد بو گروه واشنگتن بیلن یخشی مناسبتلرنی یۉلگه قۉییش و امریکا قۉشمه ایالتلرینینگ کابلدهگی اېلچیخانهسینی قَیته آچیشنی ایستهیاتگنینی ایتدی.
او جمعه کونی (۶-سنبله) نشراتگه اوزهتیلگن «آرتی هند» تلویزیون ترماغیگه بېرگن صحبتیده طالبلر برچه دولتلر، جملهدن امریکا قۉشمه ایالتلری بیلن یخشی مناسبتلر اۉرنهتیشنی ایستهیاتگنینی ایتگن.
اونینگ سۉزلریگه کۉره، «افغانستان و امریکا اۉرتهسیدهگی مناسبتلر جوده مهم و بیز بو مناسبتلرنینگ یخشی بۉلیب قالیشینی ایستهیمیز».
طالبلر مطبوعات سۉزلاوچیسی امریکادن «اوروش دوریدهگی سیاست»نی اۉزگرتیریشنی سۉرهگن.
او شوندهی دېدی: «بیز امریکا اېلچیخانهسینینگ افغانستانده قَیته فعالیت باشلشینی، افغانستاننینگ واشنگتندهگی اېلچیخانهسی قَیته آچیلیشینی و ایکّی دولت اۉرتهسیده نارمل دیپلوماتیک مناسبتلر تیکلنیشینی ایستهیمیز.»
مجاهد امریکا تامانیدن موزلهتیب قۉییلگن افغانستان نینگ میلیاردلب دالرلیک بایلیگی آزاد قیلینسه، بو مناسبتلرگه قندهی تأثیر قیلیشی حقیدهگی سوالگه جوابن، بو «شبههسیز» طالبلرنینگ امریکا بیلن مناسبتلرینی یخشیلشگه یاردم بېریشینی ایتگن.
اونینگ ایتیشیچه، موزلهتیلگن بایلیکلرنینگ بیر قِسمی افغانستان مرکزي بانکیگه تېگیشلی بۉلیب، مالیوي ذخیره صفتیده سقلنماقده. ملي تدبیرکارلرگه تېگیشلی قِسمی اېسه اولرنینگ اۉزلریگه قَیتریلهدی.
طالبلر مطبوعات سۉزلاوچیسی، شونینگدېک، اوشبو گروه نیمه سببدن مسلمان دولتلری تامانیدن تن آلینمهیاتگنی حقیدهگی سوالگه هم جواب بېرگن.
مجاهدنینگ ایتیشیچه، طالبلر سعوديه عربستانی، قطر، بیرلشگن عرب امیرلیکلری، ایران، پاکستان، اۉزبېکستان، تورکمنستان و تاجیکستان کبی مسلمان دولتلری بیلن «نارمل مناسبتلر و رسمي علاقهلر»گه اېگه.
اونینگ قۉشیمچه قیلیشیچه، حاضرده بو دولتلرنینگ کابلدهگی اېلچیخانهلری فعالیت یوریتماقده، افغانستاننینگ اوشبو مملکتلردهگی اېلچیخانهلری اېسه طالبان نظارتیده. بیراق اولر تن آلیش مسألهسینی آچیق اعلان قیلمهیاتگنی «اۉزلری نینگ ایشی».
مجاهد اوشبو صحبتده طالبلرنینگ گلوبل مقیاسده تن آلینیشی و مشروعیتی انسان حقوقلریگه رعایه اېتیش بیلن باغلنهیاتگنینی «عدالتسیز» دېب اتهگن.
طالبلر خلقارا مقیاسده تن آلینیشی اوچون عیاللر تعلیم آلیشی و ایشلشیگه قۉییلگن چېکلاولرنی بېکار قیلیشی ممکنمی، دېگن سوالگه او بوندهی شرطلرنینگ خلقارا همجعیت تامانیدن قۉییلیشینی «عدالتسیز» دېب بهالهگن.
اونینگ ایتیشیچه، طالبلر معین توپراققه اېگه و اهالیگه خدمتلر کۉرستماقده، شو سببلی اونی تن آلیش کېرهک. بیراق بیرلشگن ملتلر تشکیلاتی نینگ «قۉشیمچه شرطلر» قۉییشی «عدالتسیز»دیر.
بو حالت طالبلر افغانستانده حاکمیتنی اېگهلهگنیگه بېش ییل بۉلگنیگه قرهمهی، حاضرچه فقط روسيه اوشبو گروهنی افغانستاندهگی «حکومت» صفتیده تن آلگن بیر پیتده یوز بېرماقده. طالبلر امریکا بیلن نارمل مناسبتلر اۉرنهتیش و کابلدهگی امریکا اېلچیخانهسینی قَیته فعاللشتیریشنی بیر نېچه بار سۉرهگن بۉلسه-ده، واشنگتن حاضرگچه طالبلرنینگ بو طلبیگه جواب بېرمهگن.
