«افغانستان خبرچیلر مرکزی» طالبلردن «لاپیس» مېدیا مرکزیگه اۉز فعالیتینی قَیته باشلشگه رخصت بېریشنی سۉرهدی.
اوشبو مرکز جمعه کونی (۶-سنبله) بیانات نشر قیلیب، طالبلردن مملکتده عامهوي اخبارات واسطهلری فعالیتیگه قۉییلگن چېکلاولرگه و مستقل یېتکرمهنی ضعیفلشتیریشگه قرهتیلگن حرکتلرگه چېک قۉییشنی سۉرهدی.
مذکور تشکیلات طالباندن «لاپیس» ادارهسینی قَیته آچیشگه و اونینگ خادملریگه هېچ قندهی چېکلاو و حبسگه آلینیشی قۉرقوویسیز اۉز فعالیتلرینی دوام اېتتیریشگه رخصت بېریشنی سۉرهگن.
«افغانستان ژورنالیستلری مرکزی» اۉز منبعلریگه تهیهنیب، «لاپیس» مېدیا مرکزی چهارشنبه کونی (۴-سنبله) طالبان استخباراتی تامانیدن یاپیلگنینی معلوم قیلگن.
تشکیلات نینگ ایتیشیچه، طالبان کابلدهگی وزیر اکبرخان منطقهسی نینگ ۱۲کۉچهسیده جایلشگن «لاپیس» ادارهسینی یاپیش وقتیده اونینگ جهازلرینی، جملهدن، کامپیوتېرلر و معلوماتلرنی سقلش دیسکلری کبی واسطهلرنی مصادره قیلیب، اۉزی بیلن آلیب کېتگن.
«افغانستان خبرچیلر مرکزی» طالبلر استخباراتی خادملریدن بیریگه تهیهنیب، «لاپیس» مېدیا مرکزی ایشی قۉشیمچه تېکشیروو و تېرگاودن سۉنگ محکمهگه یوباریلیشی رېجهلشتیریلهیاتگنینی یازگن.
چهارشنبه کونی طالبلر استخباراتیگه علاقهدار «هندوکوش آوازی» مېدیا واسطهسی «لاپیس» ادارهسی یاپیلگنی حقیده خبر بېرگن. اونده اوشبو تشکیلات نینگ اَیریم خادملری خارجده اېکنی، مملکت ایچیده یشهیاتگن اَیریم خادملر اېسه قیدیرووده اېکنی یازیلگن.
«هندوکوش آوازی» خبریگه کۉره، طالبان اوشبو مېدیا مرکزینی یریم یلنگغچ فلملر، کنسرتلر و غربانه اسلوب همده غایهلرنی ترغیب قیلووچی باشقه ویدېو متریاللردن قیسقه لوحهلرنی ترقهتیشده عیبلهگن.
«موبی گروپ» کمپنیسیگه قرهشلی «لاپیس» مېدیا مرکزی مېدیا محتوا ایشلب چیقریشدن تشقری، باربد، فضا، دریا و شمس کبی بیر نېچته سینما و موسیقه ترقهتیش پلاتفورملرینی هم باشقرهدی.
یېتّی آسیا و افریقا مملکتیده فعالیت یوریتووچی مېدیا کمپنیسی «موبی گروپ» سهمدارلریدن بیری افغانستان وطنداشی سعد محسینی حسابلنهدی. اوشبو ترماق کابلده «طلوع نیوز»، «طلوع»، «لمر» تلویزیونلری، «آرمان» و «ارهکوزيا» رادیولری، «کابورا» دوبلیج و مېدیا محتوا ایشلب چیقریش مرکزی، «باربود» موسیقه ایشلب چیقریش و ترقهتیش مرکزی، «لاپیس مېدیا مرکزی همده باشقه بیر قطار تېگیشلی تشکیلاتلرنی تشکیل اېتگن.
سعد محسینی سۉنگگی بېش ییل دوامیده بیر نېچه بار خلق ارا همجمعیتنی طالبلر بیلن «ملاقات» قیلیشگه چقیرگن.
جملهدن، جاري هجري-شمسي ییل نینگ جوزا آییده لندنده بۉلیب اۉتگن ییغیلیشده او افغانستانده عیاللر اوچون وضعیتنی «نارمل» دېب اتهگنیده، مملکت وطنداشلری، خصوصاً، عیاللر و مدنی جماعه چیلیک وکیللرینینگ کېسکین ناراضیلیگیگه سبب بۉلگن.
