طالبلر مطبوعات سۉزلاوچیسی ذبیح الله مجاهد جمعی پیمان خوفسیزلیک شرطنامهسی تشکیلاتینینگ افغانستان و تاجیکستان چېگرهلریدهگی خوفسیزلیک بارهسیدهگی خواطرلری «حقیقتگه تۉغری کېلمسلیگینی» ایتدی. او، احتمال، اَیریم «منفعتدار دولتلرنینگ استخبارات دایرهلریگه» علاقهدار گروهلر اوشبو تشکیلاتگه ناتۉغری معلوماتلر یېتکزگن بۉلیشی ممکنلیگینی بیلدیردی.
طالبلر مطبوعات سۉزلاوچیسی «طلوع نیوز»گه بېرگن صحبتیده بو گروه قۉشنی دولتلر بیلن چېگرهلردهگی معمالردن خبردار اېکنینی و افغانستان حدودیدن باشقه هېچ بیر دولتگه خوف توغیلمهیاتگنینی ایتگن.
جمعی پیمان خوفسیزلیک شرطنامهسی تشکیلاتی باش کاتبی طلعتبیگ مصدقاوفتشکیلات تاجیکستان و افغانستان چېگرهلری خوفسیزلیگینی مستحکملش مقصدیده جاري ییل کوزیگه قدَر بیرینچی قورال-یراغ و حربي تخنیک پارتیهسینی تاجیکستان حکومتیگه یېتکزیب بېریشینی معلوم قیلگن.
او روسيه نینگ «تاس» اخبارات آژانسیگه بېرگن صحبتیده چېگرهلر خوفسیزلیگی «نهفقط تاجیکستان، بلکه اوشبو تشکیلاتنینگ برچه اعضالری اوچون علیحده اهمیتگه اېگه، چونکه بولر بیزنینگ جَنوبي چېگرهلریمیزدیر»، دېگن.
تشکیلات باش کاتبینینگ قۉشیمچه قیلیشیچه: «خدا کۉرسهتمسین، او یېرده بیرار حادثه یوز بېرسه، بو فقط تاجیکستاننینگ معماسی بۉلمهیدی؛ بو تشکیلاتگه اعضا برچه دولتلر، شونینگدېک، مستقل دولتلر همدۉستلیگینینگ باشقه دولتلری اوچون هم معما بۉلهدی.»
اونینگ ایتیشیچه، دولتلر اوّلراق تاجیکستانگه قندهی قورال-یراغ یېتکزیب بېریلیشی بارهسیده کېلیشیب آلگن و بیرینچی یېتکزیب بېریشلر جاري ییل کوزیدن باشلنهدی.
او روسيه اوشبو مسوولیتنینگ اساسي قِسمینی اۉز ذمّهسیگه آلیشی و تاجیکستان چېگرهلرینی مستحکملش اوچون قورال-یراغ همده تخنیک یېتکزیب بېریشده اساسي رۉلنی بجریشینی ایتگن.
خوفسیزلیک شرطنامهسی تشکیلاتی ۲۰۲۴-ییل نوامبریده تاجیکستان و افغانستان اۉرتهسیدهگی چېگره خوفسیزلیگینی مستحکملش بۉییچه بېش ییللیک دستور ایشلب چیققن. اوشبو دستورنی عملگه آشیریش اۉتگن ییلدن باشلنگن.
بوندن تشقری، افغانستان حدودیدن تاجیکستانگه اویوشتیریلگن هجوملر جمعی پیمان خوفسیزلیک شرطنامهسی تشکیلاتیگه اعضا دولتلرنینگ خواطرلرینی کوچهیتیرگن.
۲۰۲۵-ییل نوامبریدن بویان تاجیکستانده افغانستان حدودیدن عملگه آشیریلگن بیر نېچته هجوم قید اېتیلگن. اوشبو هجوملرده بیر قطار شخصلر، جملهدن، چین وطنداشلری هلاک بۉلگن و یرهلنگن. طالبلر تاجیکستان نینگ خوفسیزلیک بارهسیدهگی خواطرلرینی برطرف اېتگنینی بیلدیرگن. بیراق، کۉرینیشیدن، دوشنبهه هنوز جمعی خوفسیزلیک شرطنامهسی تشکیلاتی بیلن همکارلیکده یاردم آلیش و چېگرهلری خوفسیزلیگینی کوچهیتیریشگه اینتیلماقده.
