طالبلرنینگ اقتصادي مسألهلر بۉییچه اۉرین باسری عبدالغنی برادر رئیسلیگیدهگی ملي تدارکات کمیسیونی هلمند ولایتیده۲۱۴ میلیون افغاني قیمتیدهگی شفاخانه قوریلیشینی معقولهدی.
طالبلر باش وزیری اقتصادي مسألهلر بۉییچه اۉرین باسرینینگ ادارهسی بوگون (یکشنبه، ۸-سنبله) بیانات بېریب، اوشبو شفاخانه ۱۲ مینگ متر مربع میدانده قوریلیشی و۲۰۰ اۉرینلی بۉلیشینی معلوم قیلدی.
اوشبو اداره بیاناتیگه کۉره، شفاخانه تخمیناً ایکّی ییل ایچیده قوریب بیتکزیلیشی رېجهلشتیریلگن. اونده شاشیلینچ یاردم، سراپا، اورتوپیدی، کۉز، عقلیوعصبی، بالهلر و نسائی و ولادیبۉلیملری فعالیت یوریتهدی.
طالبلر باش وزیری اقتصادي مسألهلر بۉییچه اۉرین باسری ادارهسی شفاخانه قوریلیشی خرجتلری قندهی مالیهلشتیریلیشینی انیقلشتیرمهگن.
اوّل هم بو گروه باميان و پنجشېر کبی ولایتلرده کانلرنی قزیب آلیشدن توشگن درآمدلرنی باشقه ولایتلردهگی، جملهدن جَنوبي ولایتلردهگی قوریلیش لایحهلریگه یۉنهلتیرگن.
بوندن تشقری، طالبلر اوّلراق کابل غربیدهگی بیر شفاخانه نینگ جهاز و امکانیتلرینی پایتختنینگ شرقي قِسمیگه کۉچیرگن اېدی. بو حالت کېنگ تنقیدلرگه سبب بۉلیب، افغانستان اهالیسی نینگ بیر قِسمینی طبي خدمت و امکانیتلردن محروم قیلیش صفتیده بهالنگن.
