افغانستاننی تنیشتیریش همده مملکتده‌گی حاضرگی وضعیت و سۉنگگی اۉزگریشلر حقیده پولند خلقیگه معلومات بېریش مقصدیده پولند نینگ کراکوف شهریده اوچره‌شوو اۉتکزیلدی.
اوچره‌شوو تیناوون، چهارشنبه کونی، ۲۲ میزان سنه‌سیده کراکوف شهر جماعت کتبخانه‌سیده اۉتکزیلدی. اونده بیر گروه پولندلیک فقرالر، تدقیقاتچیلر و محصللر اشتراک اېتدی.
افغانستان ایچکی ایشلر وزیرلیگی نینگ جنایتچیلیککه قرشی کوره‌ش بۉلیمی نینگ سابق باشلیغی و «یاگیلونیا» بیلیم یورتی‌نینگ دوکتورا تدقیقاتچیسی بیسم‌الله تابان اوچره‌شووده سۉزگه چیقیب، طالبلر حکمرانلیگی آستیده‌گی افغانستان انسان حقوقلری باره‌سیده اېنگ آغیر وضعیتلردن بیریگه دوچ کېله‌یاتگنینی تأکیدله‌دی. اونینگ ایتیشیچه، کېنگ کۉلملی چېکلاولردن اېنگ کۉپ عیاللر و قیزلر ضرر کۉرماقده.
اونینگ قۉشیمچه قیلیشیچه، افغانستانده‌گی عیاللر تعلیم آلیش، ایشلش و اجتماعي حیاتده اشتراک اېتیش کبی اېنگ اساسي انساني حقوقلردن محروم اېتیلگن.
تابان‌نینگ سۉزلریگه کۉره، طالبلر سۉنگگی بېش ییل دوامیده چیکلاولرگه ته‌یه‌نیب، اۉز حاکمیتینی سه‌قلب کېلماقده. بو تضییقلر فقط عیاللرنی نشانگه آلمه‌گن، بلکه جمعیت نینگ باشقه قتلملری، جمله‌دن، سابق خوفسیزلیک و مدافعه کوچلری اعضالری، ییتکرمه خادملری همده انسان حقوقلری حمایه‌چیلریگه نسبتاً هم تعقیب و تضییقلر عملگه آشیریلگن.
او اَیریم اېتنیک و دیني گروهلرگه، خصوصاً، هزاره‌لرگه نسبتاً تیزیملی و مقصدلی تعقیبلر عملگه آشیریله‌یاتگنی حقیده‌گی حالتلردن خواطر بیلدیردی. اونینگ ایتیشیچه، اَیریم حاللرده اوشبو گروه وکیللری باسیم آستیده قالیب، اوی-جایلری، ملکلری و یشش جایلرینی ترک اېتیشگه مجبور بۉلگن.
تابان طالبلرنینگ کابل غربیده‌گی یوزلب عایله‌لرنی اۉز اویلریدن چیقریشگه اورینه‌یاتگنی حقیده‌گی خبرلرگه توخته‌لیب، بونده‌ی حرکتلر افغانستان‌ده ملک حقوقی، یشش خوفسیزلیگی و ضعیف عایله‌لر نینگ احوالی یوزه‌سیدن جدّي خواطرلرنی کېلتیریب چیقره‌یاتگنینی ایتدی.
او اشتراکچیلرنی امکان قدَر افغانستان خلقی نینگ، اینیقسه، عیاللر و حمایه‌گه محتاج گروهلر نینگ آوازی بۉلیشگه همده اولر نینگ احوالینی خلق‌ارا مقیاسده یاریتیشگه حرکت قیلیشگه چقیردی.
تابان، شونینگدېک، افغانستان قیزلری‌نینگ تعلیم آلیشلرینی عملي جهتدن قۉللب-قوّتلش ضرورلیگینی تأکیدلب، اشتراکچیلردن امکانیت بۉلسه، اۉزلری یشه‌یاتگن شهرلرده‌گی یونیورسیتیلرده هېچ بۉلمه‌گنده بیر نفر افغانستانلیک قیز نینگ تعلیم آلیشی اوچون شرایط یره‌تیشگه یاردم بېریشنی سۉردی.
یاگیلونیا بیلیم یورتی‌نینگ اېرانشناسلیک یۉنه‌لیشی طلبه‌سی بارتیک ودزیموک هم اوچره‌شووده افغانستان خلقی نینگ بای مدنیتی و بو مملکت نینگ منطقه‌ده‌گی، خصوصاً، ایران و تاجیکستان کبی دولتلر بیلن مدني اۉخشه‌شلیکلری حقیده سۉز یوریتدی.
او اوشبو مملکتلر خلقلری اۉرته‌سیده‌گی مدني و تاریخي علاقه‌لرگه اورغو بېریب، اۉز قره‌شلرینی اشتراکچیلر بیلن اۉرتاقلشدی.
اوچره‌شوو اشتراکچیلری افغانستان مدنیتی و جمعیتی نینگ تورلی جهتلری حقیده کۉپراق معلوماتگه اېگه بۉلگنلرینی تأکیدلب، طالبلر نینگ عیاللر و قیزلرگه نسبتاً جاري اېتگن چېکلاولریدن خواطر بیلدیردیلر.
