طالبلر تشقی ایشلر وزیری امیرخان متقي امریکا حکومتیدن افغانستان کانلریگه سرمایه کیریتیشنی سۉرهدی.
متقی امریکانینگ «فایننشال تایمز» گزیتهسیگه بېرگن مصاحبیهسیده، بوگون (دوشنبه، ۹-سنبله) نشر قیلینگن صحبتده، طالبلر اقتصادي ساحهده «آچیق اېشیکلر سیاستی»نی قبول قیلگنینی ایتگن.
امیرخان متقی طالبلرنینگ امریکا بیلن مناسبتلری حقیدهگی سوالگه جوابن: «افغانستان امریکا قۉشمه ایالتلرینینگ کانچیلیک، آستقورمه، اېکینچیلیک و تجارت ساحهلریدهگی سرمایهلرینی تۉلیق آلقیشلهیدی»، دېگن.
او طالبلر و امریکا اۉرتهسیدهگی مناسبتلر «اۉتگن۲۰ ییللیک اوروش نقطهٔ نظریدن بهالنمسلیگی، بلکه کېلهجکدهگی همکارلیک اساسیده بۉلیشی کېرهک»لیگینی قۉشیمچه قیلگن.
بیراق متقی طالبلر امریکانینگ افغانستان کانلریگه سرمایه کیریتیشی حقیدهگی پیشنهادینی بېواسطه آق اویگه بیلدیرگن یاکه بیلدیرمهگنینی انیقلشتیرمهگن.
«فایننشال تایمز» گزیتهسینینگ یازیشیچه، امریکا جمهور رییسی دونالد ترامپ طالبلر بیلن یقینراق مناسبتلر اۉرنهتیشگه «کم قیزیقیش» بیلدیرگن و کابل شِمالیدهگی بگرم پایگاهسینی امریکا نظارتیگه قَیتریشنی پیشنهاد قیلگن. طالبلر بو تکلیفنی بیر نېچه بار رد اېتگن.
متقی افغانستاندهگی برچه حربي و ملکی تاسیسات، جملهدن بگرام پایگاهسینی هم افغانستان نینگ ملي ملکی اېکنینی ایتگن. شو بیلن بیرگه، او آق اوینی امریکا نینگ کابلدهگی اېلچیخانهسینی قَیته آچیشگه چقیرگن.
امریکا و افغانستاننینگ سابق حکومتی تامانیدن آلیب باریلگن جیولوگیک تدقیقاتلر شونی کۉرسهتهدیکی، افغانستان نینگ مس، تېمیر، نیابي، کوبالت، آلتین و لیتيم کبی مینیرال منبعلری اۉنلب ییللیک ماجرالر سببلی کتّه قِسمی اۉزلشتیریلمهی قالگن بۉلیب، اولر نینگ قیمتی قریب بیر تریلیون دالرگه بهالنهدی.
طالبان ۲۰۲۱-ییلده افغانستانده حاکمیتنی قَیته اېگهلهگنیدن سۉنگ خارجي سرمایهگه «آچیق اېشیکلر سیاستی»نی اعلان قیلیب، اَیریم طبيعي منبعلرنی قزیب آلیش جریانینی باشلهگن.
خبرلرگه کۉره، طالبلر سۉنگگی بېش ییل دوامیده آلتین و کرومیت کانلرینی قزیب آلیش بۉییچه چین و ایران کمپنیلری بیلن عمومي قیمتی یېتّی میلیارد دالردن آرتیق بۉلگن شرطنامهلرنی امضالهگن.
