شانگهای همکارلیک تشکیلاتیگه اعضا دولتلرنینگ رهبرلری بیشکېکده‌گی ییغیلیش یکوني بیاناتیده افغانستانده‌گی جمعیت‌نینگ برچه سیاسي و اېتنیک گروهلری وکیللری کېنگ اشتراک اېته‌دیگن همه شمول حکومت توزیلیشی مملکتده برقرار تینچلیک و آسایشته‌لیککه اېریشیش‌نینگ یگانه یۉلی اېکنینی تأکیدله‌گن.
بوگون (سه‌شنبه، ۱۰سنبله) اعلان قیلینگن بیاناتده اولر تروریزم، اوروش و گیاهوند مادّه‌لردن خالی بۉلگن مستقل، بې‌طرف و تینچ افغانستاننی برپا اېتیش باره‌سیده‌گی اۉز مجبوريتلرینی ینه بیر بار تصدیقله‌گن.
شانگهای همکارلیک تشکیلاتیگه اعضا دولتلر رهبرلری، شونینگدېک، خلق‌ارا همجعمیت‌نینگ افغانستان‌ده تینچلیک، برقرارلیک و ترقیاتنی تأمینلشگه قره‌تیلگن سعی-حرکتلرینی قۉللب-قوّتلشگه تیار اېکنینی بیلدیرگن.
شانگهای همکارلیک تشکیلاتی دولت رهبرلری کېنگشی‌نینگ ییغیلیشی تشکیلات تشکیل اېتیلگنی نینگ 25 ییللیگی مناسبتی بیلن کېچه قیرغیزستان پایتختی بیشکېک شهریده باشلنگن و بوگون بیانات امضالنیشی بیلن یکونلنگن.
ییغیلیش دوامیده افغانستانده‌گی وضعیت هم تشکیلاتگه اعضا دولتلر رهبرلری محاکمه‌لری‌نینگ اساسي موضوعلریدن بیری بۉلگن. کۉپلب معروضه‌چیلر افغانستانده‌گی مسأله‌لرگه، خصوصاً، خوفسیزلیک و انسان حقوقلری حالتیگه تۉخته‌لگن.
افغانستان ۲۰۰۵-ییلدن بویان شانگهای همکارلیک تشکیلاتی نینگ کوزه‌تووچی اعضاسی حسابلنه‌دی. بیراق طالبلر مملکت اوستیدن قَیته نظارت اۉرنه‌تگنیدن سۉنگ، افغانستان‌دن بیرارته وکیل هم اوشبو تشکیلات ییغینلریگه تکلیف اېتیلمه‌یپتی.
