خلقارا عامهوي اخبارات واسطهلری هندستان و نېپالده سوو تاشقینی همده یېر کۉچکیلری عاقبتیده کمیده ۷۰ کیشی هلاک بۉلگنینی خبر قیلدی.
رویترز خبر گزارلیگینینگ خبر بېریشیچه، هندستاننین گاوتار پرادش ایالتیده سوو تاشقینی و یېر کۉچکیلری عاقبتیده ۵۶کیشی هلاک بۉلگن، ۴۶ کیشی جراحتلنگن و مینگدن آرتیق اوی ضرر کۉرگن.
مذکور نشر خبریگه کۉره، نېپالده اېسه ۱۴ کیشی هلاک بۉلگن، ۱۱ کیشی بېدرَک یۉقالگن. رسميلر ینه کوچلی تۉستدن کېلهدیگن سوو تاشقینلری یوز بېریشی ممکنلیگیدن آگاهلنتیرگن.
هندستان نینگ اوتار پرادز ایالتی یاردم ایشلری بۉییچه کمیساری «ریشیکش باسکار یاشود» نینگ ایتیشیچه، ایالتده سۉنگگی ایکّی کون ایچیده ۶۶.۵ ملیمتر یاغینگرچیلیک کوزهتیلگن. حالبوکه، اوشبو دور اوچون عادتي یاغینگرچیلیک مقداری ۷.۶ ملیمترنی تشکیل اېتهدی.
رویترز نینگ یازیشیچه، ایالت رسميلری سوو باسگن حدودلرده قوتقروو ایشلرینی آلیب بارماقده و جبرلنگنلرگه یاردم ترقهتماقده. شونینگدېک، تېگیشلی مسووللرگه قیشلاق خۉجهلیگی اېکینلریگه یېتکزیلگن ضررلرنی بهالش و تاوان پولی تۉلهش چارهلرینی کۉریش تاپشیریلگن.
مذکور نشر خبریگه کۉره، نېپال رسميلری مملکتدهگی ۷۷منطقهدن ۴۹ تهسیده تۉستدن یوز بېرهدیگن سوو تاشقینلری احتمالی بارلیگیدن آگاهلنتیرگن. اولر اساسي و کیچیک دریالردهگی سوو سطحی کۉتریلیشده دوام اېتهیاتگنی سببلی اوشبو حدودلرنینگ یرمیدن کۉپی تۉستدن کېلهدیگن سوو تاشقینلری خوفی یوقاری بۉلگن حدودلرگه ایلنیشی ممکنلیگینی بیلدیرگن.
نېپال ملي آفت خوفینی کمهیتیریش و باشقریش تشکیلاتی وکیلی شانتی ماهات نینگ ایتیشیچه، اۉتگن آی سوو تاشقینلری عاقبتیده بیر مینگ ۴۵۰ دن آرتیق کیشی هلاک بۉلگن و مینگلب آدملر بېدرَک یۉقالگن راسووا و نوواقات حدودلری همان «هوشیار» بۉلیشی کېرهک. بیراق حاضرچه اولر خوفی یوقاری حدودلر قطاریگه کیریتیلمهگن.
بوندن تشقری، نېپال نینگ منانگ، موستانگ، میاگدی و باگلونگ حدودلریده سوو تاشقینی و یېر کۉچکیلری الکتر تأمیناتینی بوتونلهی اوزیب قۉیگن. مملکت انرژی وزیرلیگی برق تأمیناتینی قَیته تیکلش بۉییچه ایشلر آلیب باریلهیاتگنینی بیلدیرگن.
نېپال سوو منبعلری و انرژی وزیرینینگ ایتیشیچه، راهوگنگه دریاسینینگ تاشیشی ۴۰ مېگاوات قوّتگه اېگه گیدراېلېکتر لایحهسی نینگ برق اوزهتیش لینيهلریگه ضرر یېتکزگن.
هندستانده اېسه مرکزي سوو کمیسیونی یېتّی ایالتدهگی دریالرنی کوزهتووچی ستشنلرده سوو سطحی «کریتیک» حالتنی کۉرسهتهیاتگنینی معلوم قیلگن. گَنگا، گنداک، کاسی، بهگاگماتی و نارماده کبی بیر قنچه ییریک دریالرده سوو سطحی خوفلی چېگرهدن آشگن.
