طالبلرنینگ ننگرهار ولایتی خوفسیزلیک قوماندانلیگی‌نینگ معلوم قیلیشیچه، ولایت‌نینگ چپرهار و بتیکوت اولسواللیکلریده علیحده صادر بۉلگن ایکّی ترافیک حادثه‌سیده تۉرت کیشی هلاک بۉلگن، ینه ۱۳کیشی یره‌لنگن.
طالبلرنینگ ننگرهارده‌گی خوفسیزلیک قوماندانلیگی مطبوعات سوزلاوچیسی سید طیب حمادنینگ ایتیشیچه، هر ایکّی حادثه بوگون (جمعه، ۱۰ میزان) صادر بۉلگن.
اونینگ سۉزلریگه کۉره، بیرینچی حادثه‌ده بتیکون اولسواللیگی حدودیده «سوزوکی» روسوملی موتر اغدریلیب کېتگن. نتیجه‌ده ایکّی کیشی هلاک بۉلگن، ۱۳ کیشی جراحتلنگن.
اونینگ ایتیشیچه، جراحتلنگنلر آره‌سیده عیاللر و باله‌لر هم بار.
حمادنینگ ایتیشیچه، ایکّینچی حادثه چپرهار اولسواللیگی حدودیده‌گی «دولت‌زی» منطقه‌سیده صادر بۉلگن.
اونینگ قۉشیمچه قیلیشیچه، اوشبو حادثه‌ده یۉلنی کېسیب اۉته‌یاتگن ایکّی باله «سراچه» روسوملی موتر اوریب کېتیشی عاقبتیده هلاک بۉلگن.
طالبلرنینگ ننگرهارده‌گی خوفسیزلیک قوماندانلیگی مطبوعات سوزلاوچیسی هر ایکّی حادثه‌گه هیداوچیلرنینگ احتیاطسیزلیگی و یۉل حرکتی قاعده‌لریگه رعایه قیلمه‌گنی سبب بۉلگنینی ایتگن.
هیداوچیلرنینگ احتیاطسیزلیگی، جمله‌دن، ناقانوني قوویب اۉتیش، یوقاری تېزلیکده حرکتلنیش، گیاهوند مادّه‌لرنی استعمال قیلیش و موتر باشقره‌یاتگنده تیلفوندن فایده‌لنیش افغانستانده‌گی ترافیک حادثه‌لری‌نینگ اساسي عامللری صفتیده کۉرسه‌تیله‌دی.
