۲۹ میزان، اۉزبېک تیلی ملي کونی مناسبتی بیلن تدبیر بریتانیانینگ منچستر شهریده بیر گروه مدنیت فعاللری، یازووچیلر، شاعرلر و یاشلر اشتراکیده اۉتکزیلدی.
تدبیرده سۉزگه چیققنلر و اشتراکچیلر اۉزبېک تیلی‌نینگ افغانستان نینگ مهم مدني و ادبي تیللریدن بیری صفتیده‌گی اهمیتی، شونینگدېک، اۉزبېکلر نینگ ملي اۉزلیگی، مدنیتی و ادبي میراثینی اسره‌ب-اوه‌یلشده‌گی اۉرنی حقیده سۉز یوریتدیلر.
محفل دوامیده فرانسه و سویدن بۉلگن مهمانلر هم ویدیو مراجعت آرقه‌لی اشتراک اېتیب، اۉزبېک تیلی ملي کونی مناسبتی بیلن اۉزبېک تیلینی، ادبیاتی و مدنیتینی قۉللب-قوّتلش ضرورلیگینی تأکیدله‌دیلر.
شونینگدېک، ییغیلیشده اۉزبېک تیلی و ادبیاتینی رواجلنتیریش، یازووچی و شاعرلرنی قۉللب-قوّتلش همده مدني-ادبي فعالیتلر اوچون کېنگراق امکانیتلر یره‌تیش مسأله‌لریگه علیحده اعتبار قره‌تیلدی.
محفل‌نینگ ینه بیر قِسمیده اۉزبېک تیلیده‌گی کتابلر، ملي طعاملر و هنرمندچیلیک نمونه‌لری کۉرگزمه‌سی تشکیل اېتیلدی. اوشبو کۉرگزمه اشتراکچیلر تامانیدن ایلیق کوتیب آلیندی.
تشکیلاتچیلرنینگ ایتیشیچه، مذکور تدبیر آرقه‌لی اۉزبېک خلقی‌نینگ تیل، ادبیات و مدني میراثی‌نینگ بیر قِسمینی کېنگراق تنیشتیریش همده تیل، ادبیات و مدنیت اۉرته‌سیده‌گی عضوي علاقه‌لرنی مستحکملش مقصد قیلینگن.
محفل یکونیده اشتراکچیلر افغانستان‌دن تشقریده هم بونده‌ی مدني تدبیرلرنی منتظم دوام اېتتیریش، شونینگدېک، تورلی مملکتلرده یشه‌یاتگن اۉزبېک تیلی فعاللری و مدنیت نماینده‌لری اۉرته‌سیده‌گی همکارلیکنی ینه‌ده رواجلنتیریش ضرورلیگینی تأکیدله‌دیلر.
