ناروی قاچقینلر کېنگشی عایله‌لرنینگ آچلیککه دوچ کېلیشی نینگ و افغانستانده‌گی وضعیت ینه‌ده آغیرلشیشی نینگ آلدینی آلیش اوچون یاردملرنی زودلیک بیلن و سېزیلرلی درجه‌ده آشیریش کېره‌کلیگینی بیلدیرگن. اینیقسه، عیاللر و باله‌لر، شونینگدېک، یقینده ایران و پاکستاندن قَیتگنلرگه یاردم بېریشگه علیحده اعتبار قره‌تیش لازم.
ناروی قاچقینلر کېنگشی باش کاتبی یان ایگلند بوگون (جمعه، ۲۴ میزان) ایکس اجتماعي ترماغیده افغانستان اهالیسی‌نینگ اوچدن بیر قِسمی بو قیشده آچلیککه دوچ کېلیشینی یازگن.
اونینگ ایتیشیچه: «حاضرده قریب ۱۶ میلیون کیشی ضرور آزیق-طعام محصولاتلریگه اېگه بۉله آلمه‌یپتی. نرخلرنینگ آشیشی، کېنگ کۉلمده‌گی ایشسیزلیک، اقلیم اۉزگریشی و یاردملرنینگ قیسقریشی بیرگه‌لیکده وضعیتنی ینه‌ده آغیرلشتیرماقده. اوشبو معماگه دوچ کېله‌یاتگنلر سانی اۉتگن ییل نینگ شو دوریگه نسبتاً ایکّی میلیون کیشیگه کۉپه‌یگن. اگر بوگون چاره کۉریلمسه، بو رقم ینه‌ده آشه‌دی.»
یان اېگلند قۉشیمچه قیلیب، اۉتگن آی کابل و قندهارده اوچره‌شگن آنه‌لر فرزندلرینی یېترلی آزیق-طعام بیلن تأمینله‌ی آلمه‌یاتگنینی و قیش کېلیشیدن خواطرده اېکنینی ایتگنینی یازگن.
او شونده‌ی یازگن: «بو وضعیت طالبلر حاکمیتنی اېگه‌لله‌گنیدن کېین افغانستان‌نینگ تشلب قۉییلیشی نینگ عاقبتیدیر. حاضر بو مملکت دنیاده‌گی اېنگ کم مقدارده‌گی گومانیتار یاردم مبلغلرینی آله‌یاتگن دولتلردن بیریدیر.»
بیرلشگن ملتلر تشکیلاتی‌نینگ آزیق-طعام و قیشلاق خۉجه‌لیگی تشکیلاتی (فائو) همده جهان آزیق-طعام دستوری (دبلیواف‌بی) افغانستان اهالیسی نینگ قریب ۴۰ فایزی بو قیشده اۉتکیر آزیق-طعام خوفسیزلیگی معماسی‌نینگ یوقاری درجه‌لریگه دوچ کېلیشی ممکنلیگیدن آگاهلنتیرگن.
شو بیلن بیرگه، بیرلشگن ملتلر تشکیلاتی‌نینگ باله‌لر جمغرمه‌سی (یونیسف) و «آچلیککه قرشی حرکت» تشکیلاتی افغانستان بۉیلب اۉتکیر تۉییب طعاملنمسلیک حالتی تاباره یامانلشه‌یاتگنینی بیلدیرگن. اولر نینگ پراگنازلریگه کۉره، ۲۰۲۷-ییلده تۉرت میلیوندن آرتیق باله دوالنیشگه محتاج بۉله‌دی. بو سۉنگگی بېش ییل ایچیده قید اېتیلگن اېنگ یوقاری کۉرسه‌تکیچدیر.
بو آگاهلنتیریشلر آزیق-طعام خوفسیزلیگینی انتیگراسیون‌لشگن تصنیفلش نینگ اېنگ سۉنگگی تحلیلیگه اساسلنگن.
اوشبو تحلیلگه کۉره، آزیق-طعام تنقیصلیگی دوریده — نوامبردن اپرېلگچه، یعنی بوتون قیش موسمینی قمره‌ب آله‌دیگن دورده قریب ۱۹.۲ میلیون کیشی، یعنی افغانستان اهالیسی نینگ ۳۸فایزی یوقاری درجه‌ده‌گی اۉتکیر آزیق-طعام خوفسیزلیگی معماسیگه دوچ کېلیشی کوتیلماقده.
