روسيه باش وزیری نینگ اۉرین‌باسری الکسی اورچوک یوقاری مرتبه‌لی اقتصادي هیئتگه باشچیلیک قیلیب، افغانستانگه تشریف بویوریشی کوتیلماقده.
روسيه جمهور رییسی نینگ افغانستان بۉییچه مخصوص وکیلی ضمیر کابلوف‌جمعه کونی (۲۴-میزان) اوشبو هیئت نینگ تشریفی حقیده معلوم قیلدی.
او مرکزي آسیا و افغانستانده‌گی خوفسیزلیک مسأله‌لریگه بغیشلنگن خوفسیزلیک شرطنامه‌سی تشکیلاتی، مستقل دولتلر همدۉستلیگی و شانگهای همکارلیک تشکیلاتی نینگ قۉشمه ییغیلیشیده مذکور تشریف روسيه و افغانستان اۉرته‌سیده‌گی سودا-اقتصادي همکارلیککه قره‌تیلیشینی ایتدی.
کابلوف روسيه طالبان نظارتی آستیده‌گی افغانستان بیلن سودا-اقتصادي علاقه‌لرنی رواجلنتیریشگه اینتیله‌یاتگنینی بیلدیردی.
او: «مملکتلریمیز اۉرته‌سیده‌گی تاور اییرباشلش حجمی آشیب بارماقده و بو کۉرسه‌تکیچ جاري ییل نینگ بیرینچی یرمیده ایکّی برابر آشدی»، دېدی.
کابلوف روسيه نینگ افغانستان بیلن سودا حجمی باشقه دولتلر بیلن سوداسیگه نسبتاً کیچیک بۉلسه-ده، ناتونینگ بو مملکتده‌گی ۲۰ییللیک موجودلیگیدن کېین بو کۉرستکیچ هم اعتبارگه مالک اېکنینی ایتدی.
او روسيه باش وزیری اۉرین‌باسری نینگ کابلگه تشریفی نینگ انیق سنه‌سینی معلوم قیلمه‌دی.
روسيه دنیاده بیرینچی بۉلیب طالبان گروهینی افغانستان حکومتی صفتیده رسماً تن آلگن دولتدیر.
روسيه تشقی ایشلر وزیری کېچه‌گی ییغیلیشده اېکسترېمیستیک گروهلر طالبان نظارتی آستیده‌گی افغانستان حدودیدن ترورچیلیک تهدیدلرینی کېنگه‌یتیریش اوچون فایده‌لنه‌یاتگنینی تن آلدی. بیراق او مسکو نینگ موضعینی حمایه قیلیب، «طالبان بو مُراضات قیلیشگه تۉغری کېله‌دیگن حقیقت»، دېدی.
