پاکستان‌نینگ «جیونیوز» عامه‌وي اخبارات واسطه‌سی خوفسیزلیک منبعلریگه ته‌یه‌نیب خبر بېریشیچه، افغانستان طالبلری‌نینگ بیر نېچه اعضاسی پاکستان کوچلری بیلن چېگره‌ده‌گی تۉقنه‌شوولرده هلاک بۉلگن.
مذکور نشر اۉز منبعلریگه ته‌یه‌نیب یازیشیچه، تۉقنه‌شوولر بوگون (شنبه، ۲۵-میزان) خیبر-پختونخوا ایالتی‌نینگ یوقاری کرّه‌م تومنیده‌گی «تایدا» و «غوزگرهی» حدودلریده طالبان کوچلری‌نینگ «اساسسیز اۉق اوزیشی» آرتیدن باشلنگن.
پاکستان خوفسیزلیک منبعلری مملکت کوچلری تۉقنه‌شوولر دوامیده افغانستان طالبلریگه تېگیشلی «تاپ سر» و «شیپولا» نظارت-اۉتکزیش پسته‌لری نشانگه آلیب، ویران قیلگنی، طالبلر کوچلری اېسه ینه بیر نظارت-اۉتکزیش پونکتینی ترک اېتگنینی بیلدیرگن.
«جیونیور» خبریگه کۉره، پاکستان خوفسیزلیک منبعلری افغانستان طالبلری «خارجي ترورچیلر» نینگ اۉتیشینی آسانلشتیریش مقصدیده اۉق اوزگنینی ایتگن.
افغانستانده‌گی طالبلر رسميلری حاضرگچه بو تۉقنه‌شوو حقیده رسماً بیانات بېرمه‌گن. بیراق «الجزیره» طالبلر حکومتی منبعلریگه ته‌یه‌نیب، تۉقنه‌شوو عاقبتیده قربانلر و یره‌دارلر بارلیگینی خبر قیلگن.
اوّلراق محلي منبعلر «اطلاعات روز» گزیته‌سیگه پکتيا ولایتی نینگ دند پتان و زازی آریوب اولسواللیکلری چېگره حدودلریده طالبلر و پاکستان کوچلری اۉرته‌سیده تۉقنه‌شوولر یوز بېرگنینی بیلدیرگن اېدی.
دند پتان‌ده‌گی بیر منبع پاکستان تامانیدن آتیلگن اَیریم راکت‌لر اهالی یشش حدودلریگه توشگنی و آدملر آغیر وضعیتده قالگنینی ایتگن اېدی.
حاضرچه اوشبو تۉقنه‌شووده یوز بېرگن قربانلر و احتمالي ضررلر حقیده انیق معلوماتلر موجود اېمس.
