بیرلشگن ملتلر تشکیلاتی‌نینگ باله‌لر جمغرمه‌سی (یونیسف) افغانستان‌ده باله‌لر فلجی یاکه پولیو کسللیگینی بوتونله‌ی یۉق قیلیشگه چقیردی.
یونیسف بوگون (جمعه، ۱ عقرب) ایکس اجتماعي ترماغیده نشر قیلگن بیاناتیده باله‌لر فلجیدن خالی افغانستانگه اېریشیش یۉلیده ملي سعی-حرکتلرگه اعتبار قره‌تیش ضرورلیگینی تأکیدله‌دی.
اېرته‌گه (شنبه، ۲ عقرب) «بوتون جهان باله‌لر فلجیگه قرشی کوره‌ش کونی» نشانلنه‌دی. اوشبو سنه ۲۰۱۲-ییلدن بویان هر ییلی دنیا بۉیلب نشانلب کېلینه‌دی.
یونیسف‌نینگ معلوم قیلیشیچه، بو سنه پولیو بوتونله‌ی یۉق قیلیش و هر بیر باله‌نی اېملش یۉلیده تینیمسیز محنت قیله‌یاتگن بیرینچی صفده‌گی خادملر نینگ سعی-حرکتلرینی قدرلش اوچون امکانیتدیر.
افغانستان و پاکستان دنیاده باله‌لر فلجی‌نینگ ینگی حالتلری هنوز قید اېتیله‌یاتگن یگانه دولتلردیر.
جهان ساغلیقنی سقلش تشکیلاتی ایکّی کون اوّل افغانستان‌ده جاري ییلده باله‌لر فلجی‌نینگ ینه آلتی حالتی انیقلنگنینی و شو طریقه قید اېتیلگن حالتلر سانی ۴۲ تگه یېتگنینی معلوم قیلدی.
تشکیلات‌نینگ ینگی گزارشیده ایتیلیشیچه، پولیونینگ ینگی حالتلریدن اوچته‌سی قندهار ولایتیده، ایکّیته‌سی ننگرهار ولایتی نینگ بتی کوت و غاوشته تومنلریده، ینه بیری اېسه کابل ولایتی‌نینگ موسهی تومنیده انیقلنگن.
جهان ساغلیقنی سقلش تشکیلاتی، شونینگدېک، جاري ییلده افغانستان‌ده اطراف-محیط نمونه‌لریده پولیو ویروس انیقلنگن حالتلر سانی ۹۳ تگه یېتگنینی بیلدیرگن.
جاري ییلده پاکستان‌ده هم پولیو بیلن کسللنیش‌نینگ انسانلرده آلتیته حالتی و اطراف-محیط نمونه‌لریده ویروس انیقلنیشی نینگ ۱۳۷ ته حالتی قید اېتیلگن.
