۲۹ میزان، اۉزبېک تیلی ملی کونی مناسبتی بیلن بوگون، جمعه ۱ عقرب‌ده فاریاب ولایتی‌نینگ اندخوی اولسواللیگیده یازووچیلر، شاعرلر، ضیالیلر، بیلیم یورت اۉقیتووچیلری، قوم آقسقاللری، علمالر و یاشلر اشتراکیده محفل اۉتکزیلدی.
مراسمده سۉزگه چیققنلر آنه تیلی‌نینگ اهمیتی و اۉزبېک تیلی‌نینگ افغانستانده‌گی اۉرنی حقیده سۉز یوریتیب، بو تیلنی اسره‌ش و رواجلنتیریشگه قره‌تیلگن مدني تدبیرلرنی اۉتکزیش ضرورلیگینی تأکیدله‌دیلر.
اولر بونده‌ی محفلرنی اۉتکزیش اۉزبېک تیلی و مدنیتینی اسره‌ش، ملي-مدني اۉزلیکنی مستحکملش همده تیل و مدني میراثنی کېله‌جک اولادلرگه یېتکزیشده مهم اهمیتگه اېگه اېکنینی بیلدیردیلر.
مراسم دوامیده اندخوی اولسواللیگیده‌گی مکتبلرنینگ ترانه جماعه‌لری هم بو مناسبت بیلن تیارله‌گن ترانه‌لریی اجرا اېتدیلر. شونینگدېک، بیر قطار شاعر و ضیالیلر اۉزبېک تیلی ملي کونیگه بغیشلنگن شعر و ایجاد نمونه‌لرینی اۉقیب بېردیلر.
محفل‌نینگ ینه بیر قِسمیده اۉزبېکلرنینگ ملي طعاملری، کتابلر، ملي کییملر و هنرمندچیلیک بویوملری کۉرگزمه‌سی تشکیل اېتیلدی.
محفل تشکیلاتچیلری‌نینگ ایتیشیچه، اوشبو تدبیردن کۉزلنگن اساسي مقصد اۉزبېک تیلینی اولوغلش، اونینگ مدني امکانیتلرینی نمایش اېتیش همده یاش اولادنی تیل و مدني میراثنی اسره‌ب-اوه‌یلشگه اونده‌شدن عبارت.
