طالبلر سوزلاوچیسی ذبیح‌الله مجاهد بو گروه پاکستان‌ده بې‌قرارلیک کېلتیریب چیقریش امکانیتیگه اېگه اېمسلیگینی و بوندن هېچ قنده‌ی منفعت کۉرمسلیگینی، عکسینچه، بوندن ضرر کۉریشینی ایتدی.
مجاهد بوگون کېچقورون (جمعه، ۱ عقرب) ایکس اجتماعي ترماغیده نشر قیلگن بیاناتیده پاکستان رسميلری‌نینگ طالباننی پاکستانده‌گی بې‌قرارلیکلرگه علاقه‌دارلیکده عیبله‌گن بیاناتلرینی رد اېتدی.
طالبلر سوزلاوچیسی شونده‌ی دېدی: «افغانستان اوچون، خدا کۉرسه‌تمسین، پاکستان‌ده بې‌قرارلیک کېلتیریب چیقریش یاکه بو مملکتده‌گی بې‌قرارلیکنی قۉللب-قوّتلش فایده‌لی اېمس. افغانستان‌نینگ باشقه مملکتلرده بې‌قرارلیک کېلتیریب چیقریش یاکه اونی مالیه‌لشتیریش اوچون بونده‌ی امکانیتلری هم یۉق.»
ذبیح‌الله مجاهد قۉشیمچه قیلدی: «قۉشنی مملکتده‌گی بې‌قرارلیک بې‌واسطه منطقه و افغانستانگه ضرر یېتکزه‌دی. پاکستانده‌گی بې‌قرارلیک اقتصادي، اجتماعي و انساني جهتدن بیز اوچون ضررلی.»
او ینه پاکستان خوفسیزلیک رسميلری مملکت خوفسیزلیگینی تأمینلشده موفقیتسیزلیککه اوچره‌گنیدن سۉنگ، جماعتچیلیک فکرینی چلغیتیش مقصدیده مملکتده‌گی خوفسیزلیک حادثه‌لری اوچون جوابگرلیکنی افغانستان طالبلریگه یوکله‌یاتگنینی دعوا قیلدی.
بونگه جوابن طالبلر سوزلاوچیسی پاکستان حکومتینی «افغانستاننی بې‌قرارلشتیریش لایحه‌لریگه مبلغ صرفله‌یاتگنلیکده» عیبله‌دی.
بو حالت پاکستان حکومتی افغانستان طالبلرینی اۉزیگه قرشی قوراللی گروهلرنی، جمله‌دن، «بلوچستان آزادلیک اوردوسی» و «پاکستان طالبانی»نی قۉللب-قوّتلشده عیبلب کېله‌یاتگن بیر پیتده یوز بېرماقده.
پاکستان رسميلری‌نینگ ایتیشیچه، طالبلر اوشبو قوراللی گروهلرنینگ اعضالری و قوماندانلریگه افغانستان توپراغیدن باش‌پناه، حربي تیارگرلیک و هجوملرنی رېجه‌لشتیریش همده تأمینلش اوچون خوفسیز جایلر یره‌تیب بېرماقده. پاکستان سۉنگگی ایکّی ییل دوامیده کابل، مملکت‌نینگ جَنوبي و شرقي ولایتلریده‌گی تورلی حدودلرگه اۉنلب بار هلاکتلی هوا هجوملرینی عملگه آشیریب، «ترورچیلر» نینگ اۉقوو مرکزلری و باش‌پناه‌لرینی نشانگه آلگنینی معلوم قیلگن.
