امریکاده بۉلیب اۉته‌یاتگن آره‌لیق سیلاولر نینگ دستلبکی نتیجه‌لری شونی کۉرسه‌تماقده‌کی، میشیگان ایالتیدن امریکا سناسیگه دموکرا‌تیک حزب نامزادی عبدال السید جمهوریت‌چیلر نامزادی مایک راجرزدن آلدینده بارماقده. او غلبه قازانسه، امریکا تاریخیده سناگه سه‌یلنگن ایلک مسلمان بۉله‌دی.
سی‌ان‌ان تلویزیونی معلوماتلریگه کۉره میشیگان ایالتیده آوازلر نینگ ۸۵ فایزی سنه‌ب چیقیلگنیدن سۉنگ، عبدال السید ۵۲ فایز، میک راجرز اېسه قریب ۴۶فایز آواز تۉپله‌گن. اوشبو معلوماتلرگه کۉره، عبدال السید ۵۰ فایزدن آرتیق آواز بیلن غلبه قازانماقده.
السید میشیگان ایالتیده، مصرلیک مهاجرلر عایله‌سیده توغیلگن. او میشیگان بیلیم یورتیده تحصیل آلگن، «راداس» تحصیلی بورسیه‌نی قۉلگه کیریتیب، آکسفورد بیلیم یورتیدده اۉقیگن و «جماعت سلامتلیگی» یۉنه‌لیشی بۉییچه دوکتورلیک درجه‌سینی آلگن. شونینگدېک، کولمبیا بیلیم یورتیده طبیات بۉییچه دیپلوم آلگن.
السید سیلاو پایگه‌سیگه کیریشیشیدن اوّل دېترویت شهری جماعت سلامتلیگی اداره‌سیگه، کېینچه‌لیک اېسه اوین ناحیه‌سی ساغلیقنی سقلش اداره‌سیگه رهبرلیک قیلگن. او ۲۰۱۸ ییلده هم میشیگان ایالتی فرماندارایگیگه نامزادینی قۉیگن اېدی.
اونینگ سیلاوآلدی کمپنیی دونالد ترامپ نینگ شخصي هجوملری بیلن کېچدی. امریکا جمهور رییسی ۲۵-اکتوبر کونی میشیگان ایالتیده اۉتکزیلگن سیلاوآلدی میتینگیده السیدنی «جهادچی» دېب اته‌ب، اونینگ امریکاگه صداقتیگه شبهه بیلدیرگن.
ترامپ، شونینگدېک، السید سناگه کیرمسلیگی کېره‌کلیگینی تأکیدله‌گن. السید بو بیاناتلرنی شرمنده‌لی دېب اته‌ب، امریکا کانستیتوتسیه‌سی و دیني اېرکینلیک بیلن فخرلنیشینی بیلدیرگن.
السید سیلاوآلدی کمپاینیده ساغلیقنی سقلش تیزیمینی اصلاح قیلیش، عمومي طبي سوغورته تیزیمینی جاري اېتیش، ییریک کمپنیلر تأثیرینی کمه‌یتیریش و امریکا نینگ اسرایلگه حربي یاردمینی توخته‌تیشگه اورغو بېرگن اېدی.
ترامپ ۲۰۲۴-ییلگی جمهورلیک سیلاولریده غلبه قازانگن میشیگان ایالتی ده السید نینگ غلبه قازانیشی امریکا آره‌لیق سیلاولری نینگ مهم واقعه‌لریدن بیری حسابلنه‌دی. «واشنگتن پُست» نشری نینگ خبر بېریشیچه، جمهوریت‌چیلر میشیگان ایالتی ده السیدنی مغلوب اېتیش اوچون ۴۶ میلیون دالر صرفله‌گن.
