اوکراین جمهور رییسی ولادیمیر زلنسکي کېله‌سی هفته بیرلشگن عرب امیرلیکلریده روسيه بیلن اۉتکزیله‌دیگن اوچره‌شوونی تصدیقله‌دی و کي‌یف بو اوروش امکان قدَر تېزراق یکونلنیشینی ایستشینی بیلدیردی.
زلنسکي بوگون (پنج‌شنبه، ۱۴ عقرب) ایکس اجتماعي ترماغیده نشر قیلگن بیاناتیده بو مسأله یوزه‌سیدن امریکا نینگ یقین شرق و اوکراین بۉییچه مخصوص وکیلی استیو اویتکاف همده دونالد ترامپ‌نینگ کویاوی جرد کوشنر بیلن بیر یریم ساعت دوام اېتگن باتفصیل صحبت اۉتکزگنینی یازگن.
زلنسکي شونده‌ی دېب یازگن: «اوکراین، امریکا و روسيه ایشچی گروهلری درجه‌سیده اوچ تامانله‌مه اوچره‌شوو اۉتکزیشگه تیارگرلیک کۉریه‌پمیز. اوچره‌شوو بیر هفته‌دن کمراق وقت ایچیده بۉلیب اۉتیشی رېجه‌لشتیریلگن».
اونینگ قۉشیمچه قیلیشیچه، «مذاکره‌لر اوروشنی امکان قدَر تېزراق یکونلش اوچون اېنگ یوقاری سرعتده دوام اېتیشی کېره‌ک».
زلنسکي کي‌یف اوروشنی توگه‌تیش بۉییچه کېلیشووگه اېریشیشگه تیارلیگینی بیلدیریب، شونده‌ی دېگن: «اوکراین ضرور قدملرنی تشلشگه تیار».
اوکراین جمهور رییسی تکلیفلرینی امریکالیک تامانگه انیق بیان قیلگنلیکلرینی ایتگن.
بو آره‌ده تستیو اویتکاف ایکّی کون اوّل امریکا کېله‌سی هفته بیرلشگن عرب امیرلیکلریده روسيه و اوکراین اۉرته‌سیده‌گی ایشچی مذاکره‌لرگه مېزبانلیک قیلیشینی معلوم قیلگن اېدی.
اویتکاف ایکس اجتماعي ترماغیده نشر قیلگن بیاناتیده اوشبو اوچره‌شوو کېله‌سی هفته‌‌نینگ سه‌شنبه و چهارشنبه کونلری (۱۸و ۱۹ عقرب) امریکا واسطه‌چیلیگیده ابوظبی‌ده اۉتکزیلیشینی بیلدیرگن.
اونینگ ایتیشیچه، قۉشمه اوچره‌شوودن مقصد اوروشنی یکونلش یۉللرینی محاکمه قیلیش، کېسکینلیکنی کمه‌یتیریش و تینچلیک کېلیشوویگه اېریشیش اوچون زمین یره‌تیشدن عبارت.
عینِ کونلرده اوکراین‌نینگ اروپاده‌گی اتفاقچیلری هم بروکسلده مذاکره‌لر آلیب بارماقده.
زلنسکي‌نینگ ایتیشیچه، چهارشنبه کونی بروکسلده اوکراین هیئتی همده امریکت اروپا اتفاقی، فرانسه، بویوک بریتانیا، آلمان، ناتو، جهان بانکی و خلق‌ارا بیزنس همجعیتی وکیللری اشتراکیده «مضمونلی اوچره‌شوو» بۉلیب اۉتگن.
اونینگ تأکیدلشیچه، اوشبو اوچره‌شووده اساسي اعتبار «اوروشدن کېینگی قَیته تیکلش» مسأله‌سیگه قره‌تیلگن.
شونینگدېک، بوگون بروکسلده «اوکراین اوچون خوفسیزلیک کفالتلری» موضوعسیده ینه بیر اوچره‌شوو اۉتکزیلیشی رېجه‌لشتیریلگن.
