ایراننینگ اسلام انقلابی قۉریقچیلری بحریننینگ «رفاع» حربي بازهسیده جایلشگن امریکا هوا هجومیدن مدافعه تیزیمیگه قرهشلی رادارنی درونلر یاردمیده نشانگه آلگنینی معلوم قیلدی.
ایران اسلام انقلابی قۉریقچیلری جماعتچیلیک بیلن علاقهلر بۉلیمی بوگون (یکشنبه، ۲۵ عقرب) ترقهتگن بیاناتیده، «رفاع» مدافعه تیزیمی راداریگه قرهته اوچیریلگن آلتیته دروننینگ برچهسی نشانگه تېککنینی و پارتلش آوازلری بحرین نینگ تورلی حدودلریده اېشیتیلگنینی بیلدیرگن.
بوندن بیر نېچه ساعت آلدین بحرین ایچکی ایشلر وزیرلیگی احتمالي تهدید حقیده آگاهلنتیریب، مملکت یشاوچیلری و اهالیدن اېنگ یقین خوفسیز جایگه باریشنی سۉرهگن اېدی.
بیراق وزیرلیک تهدیدلرنینگ خصوصیتی حقیده قۉشیمچه معلومات بېرمهگن.
ایکّی کون آلدین (جمعه،۲۲ عقرب) هم ایران اسلام انقلابی قۉریقچیلری بحریندهگی امریکا حربي بازهسی نینگ اېرته آگاهلنتیرووچی رادارینی نشانگه آلیب، یۉق قیلگنینی دعوا قیلگن اېدی. اما امریکا اوردوسی مرکزي قوماندانلیگی (سنتکام) ایران اسلام انقلابی قۉریقچیلری نینگ بو دعواسینی رد اېتیب، ایران تامانیدن اوچیریلگن ایکّیته پارتلاوچی درون نشانگه یېتیب باریشیدن آلدین یۉق قیلینگنینی بیلدیرگن.
