اروپا اتفاقینینگ آسیا و تینچ اقیانوسی منطقهسیدهگی انسانپرورلیک یاردم ادارهسی بوگون (جمعه، ۱۲سرطان) ایکس اجتماعي ترماغیده نشر قیلگن بیاناتیده افغانستانده آنهلر سلامتلیگی بیلن باغلیق وضعیت تاباره یامانلشهیاتگنیدن آگاهلنتیردی.
اوشبو اداره: “عیاللر نینگ طبي تعلیم آلیشیگه قۉییلگن چېکلاولر و ساغلیقنی سقلش خدمتلریدن چېکلنگن درجهده فایدهلنیش موجود انقراضنی ینه-ده کوچهیتیرماقده”، دېدی.
اروپا اتفاقی نینگ انسانپرورلیک یاردم ادارهسی آنهلر و ینگی توغیلگن چقهلاقلر حیاتینی سقلب قالیشگه قرهتیلگن طبي خدمتلرنی قۉللب-قوّتلشنی دوام اېتتیریشگه وعده بېردی.
بو آرهده، بیرلشگن ملتلر تشکیلاتی هم طالبان نینگ عیاللر نینگ طبیات ساحهسیده تعلیم آلیشینی تعقیقلشی و اولرنینگ ساغلیقنی سقلش خدمتلریدن اېرکین فایدهلنیشینی چېکلشینی جدّي تشویش اویغاتهیاتگن مسأله صفتیده بهالهماقده.
بیرلشگن ملتلر تشکیلاتی نینگ انسان پرورلیک مسألهلرنی موافقلشتیریش ادارهسی (اوچا)نینگ معلوم قیلیشیچه، افغانستان دنیاده آنهلر اۉلیمی درجهسی اېنگ یوقاری بۉلگن مملکتلردن بیری بۉلیشیگه قرهمهی، طالبان آنهلر و ینگی توغیلگن چقهلاقلرنینگ حیاتینی سقلب قالووچی خدمتلردن فایدهلنیشینی هم “چېکلب قۉیگن”.
اوچا اۉتگن آی نشر قیلگن حساباتیده هر 100 مینگ توغروق قیلهیاتگن عیالدن قریب 600 نفری توغروق وقتیده حیاتدن کۉز یومیشینی بیلدیرگن.
بو کۉرستکیچ دنیادهگی آنهلر اۉلیمی درجهسی اېنگ یوقاری بۉلگن کۉرسهتکیچلردن بیری حسابلنهدی.
شوندهی آغیر وضعیتگه قرهمهی، طالبان ساغلیقنی سقلش ساحهسیده عیاللر فعالیتیگه قطعي چېکلاولر جاري اېتگن، شونینگدېک عیاللرنینگ برچه یۉنهلیشلرده، اینیقسه طبیات ساحهسیده تعلیم آلیشینی هم تعقیقلهگن.
